DUM DUM HTE HTE

MACHYE MACHYANG NI, NINGMU NI, MAHKRUM MADUP NI HPE NAW RAW HKRUT KAU YU GA

2010-01-17T08:02:00.001-08:00

* Shinggyim masha ngu ai, shangai wa ai kaw na tinang a makau grupyin, mu la , na la, chye la ai machye machyang ni hte sak hkrung lam hpe, masa lam hpe gaw de ma ai. Dai majaw Sak hkrung lam hte mungkan ga hpe mu la, na la , sharin hkaja la, mahkrum madup ni hte bu hpun sumli da ai ngu mai tsun nga ai.

Dai majaw kalang lang dai buhpun sumli da ai ni gaw hkrut kashin kau ai lam ni nnga ai majaw manam shagram, nsan nseng rai byin chye nga ai. Ningmu ngu ai hta tinang a bawnu, masin salum ni hpe raw hkraw kashin kau na she mu ra sawn ra na lam ni law law nga ai law.

Tinang a mahkrum madup ni machye machyang ni hte bu hpun sumli da ai majaw kalang lang tinang a sak hkrung lam ajet, tengman ai mungkan hpe pi ti nang nlu mu nlu chye rai magap da ai zawn rai nga ai. Dai hte maren mungkan ting hte mu mada ai lam ni hpe mung dai tinang a chye da ai lam ni hte magap da ai majaw teng man ai lam hpe nmu hku byin taw chye nga ai re.

Ti nang a sakhkrung lam hte tinang a grup yin hpe teng man ai hku jaw hkrak ai hku mu mada mayu yang gaw dai buhpun sumli ni hpe raw hkrut kau nna she bai mada yu yang gaw grau mai kaja ai lam rai na re.

Dai majaw tinang a sakhkrung lam, tinang a grupyin, prat hkrun lam ni hta bu hpun da ai buhpun sumli ni gaw shagrwi grai kap mat sai, nhpraw san mat sai majaw asan sha nlu mu mada mat ai rai nga ai.

dai majaw lam shagu hpe hpraw san ai hku lu mu mada, lu yu na matu gaw buhpun sumli hpe raw hkrut kau ga, Grup yin mahkra hte mung kan ga hpe asan sha naw mu mada dat yu ga ngu saw shaga dat ai law....

SHANGLAWT LU AI HPANG LANING MI DU HKRA

2009-12-01T07:28:00.001-08:00

- Jinghpaw Wunpawng mungdan shanglawt lu ai hpang laning mi du hkra ndai shanglawt dap hta mu naw matut gun na nngai..... ngu ai moi shanglawt hpyen la nnan shang wa ai ni a Karai a man, Hpyen dap hta ga shaka la wa masai da..

- Dai ga shaka gaw galoi du hkra ta? nkau mi sai htaw nna asak jaw kau masai, nkau mi daw hten mat masai, nkau mi pru mat masai, nkau mi matut shakut nga ma ai.

- Gara masa galai mat ai raitim, mi na shanglawt hpyen la nkau mi gaw ndai Ga shaka hpe gaw manu shadan nga dingyang rai ma ai, Dai shanglawt lu ngut ai hpang laning mi du hkra hpe la nga ma ai...

- Myen mungdan, kaga mungdan, Jinghpaw mungdan hkan jut shara shagu du taw ai shawng de na Shanglawt hpyen la ni (nkau mi) gaw ndai Ga shaka hpe asak hte maren sadi dung ra ai nga hkam la ma ai.

- KDA (sh) pru mat sai (sh) kaga Jinghpaw W.P hpyen dap hkan galaw nga ai Shanglawt hpyen la dingsa nkau mi gaw ya du hkra asak kaba sai raitim ndai hkamla da ai Ga shaka hpe sadi dung dingyang rai ma ai.

- Nkau mi asak kaba na, yak hkak nna, masa amyu myu a majaw pru mayu tim shawk pru na n gwi ma ai ( dai gaw ndai shanglawt hpyenla galaw hpang ai shaloi hkamla da ai Ga shaka a majaw rai nga ai)

******** Dai majaw gara kaw du ai raitim, gara masa hta raitim anhte Jinghpaw W.P myu sha yawng gaw lahta na share shagan ni zawn *******

NGAI SAK HKRUNG NGA DING YANG MYU SHA A MATU ngu Ga shaka hkam la shajang yang gaw, Anhte a bandung gaw dai shawng kaw sha rai sai law....

MOI NA JINGHPAW W.P NI A BAU NGOI NSEN

2009-11-14T07:33:00.001-08:00

Bau ngoi sai,

mayu gahtawng de hpaw byin sai kun?

Bau ngoi nga ai..

Sa sa sa lawan she gat saga!

mayu du ni hpang de

Dai zawn nga

ya gaw bau ndum ma sani

ngai naw na mayu nngai

Bau dum dat sai

kadai mung nsa wa ma ai..

ya gaw mayu ni..

kanang ta da ma gahtawng ni

Bau ngoi nga ai

kadai mung nna ma ai i

ya gaw hpunau ni, mayu da ma ni..

Bau nsen e..

nang hkrai sha rai mat ni ndai

moi na Bau nsen zawn

yawng hkra na hkra naw ngoi yu rit

Umm ngai mung Bau nsen la yu sai

naw ngoi rit..

Bau mung dum yu sai,

yawng na hkra naw ngoi rit

Da sang na pat da ma ai i?

Da sang ndum mat ai kun?

mayu gahtawng ni e!

da ma ni e

ngai hpu, ngai nau , ngai na ni e

Aw moi na W.P Bau nsen e

grai marit dik sa...

Myen mung Pyada ni hte seng ai lam (sh) Upadi hte seng nna koi yan ra ai lam nkau mi

2009-10-30T17:46:00.000-07:00

* Myen mung dan na Pyada (Police) ni nang hpam tsi mawan hte seng na rim ai ladat amyu myu lang ma ai. Dai hta hkrit ra dik ai gaw mahkam hkam rim ai ( trap case ) nga ma ai. Ndai hta hpa majaw hkrit ra a ta nga yang, hpa shut hpyit ai lam nnga ai raitim chye rim hkrum nga ai law. Kalang lang htaw... bum ga de na hpa nchye na ai ni, shut shai ai lam nnga tim chye rim hkrum nga ai. Lawu na lam ni gaw anhte chye da ra nga ga ai law.

(1) Shanhte pyada ni hta informer (shiga jaw ai wa/jan) ngu ai nga ai, dai ni gaw hkyiya ni (sh) pyada ni kaw na shabrai htuk sha ai ni rai ma ai. Dai hkyiya ni rai yang shanhte hpe n rim na matu marai langai ngai hpe rim lu na matu shiga tup hkrak jaw ra ai. Dai zawn re hta shiga nlu galaw ai rai yang, marai langai ngai hpe mahkam ( trap ) galaw nna chye rim ma ai.

(2) Kalang lang nang hpam tsi mawan dut ai re (sh) lu sha ai re chye tim rim na ginchyang nmu shi ai zawn re nga ai ten dai zawn mahkam (trap) chye lang ma ai.

(3) Lu sha ai lam sha rai yang gaw nrim ai daram nan dat da chye ma ai. Raitim lu sha ngut ai hpang la wa ai zawn re (sh) dut shabra na hkyen ai zawn re rai yang she rim ai law ai. Sha lu sha ai rai yang gaw jit hpe hkan kau yang mai lawt mat ai.

* Jit jep ai ngu ai hta myen mung na masa gaw gumhpraw lu nna, rim hkrum ai hte lawan dik ai hku hkan ra ai.. dai rai yang hkyiya si wa na mahka ni pi jit hta nang hpam tsi npru chye nga ai. Nlu hkan ai rai yang lu sha tim nlu sha tim marai 10 kaw na marai 8 gaw nang hpam tsi mawan lu sha ai kumla (sign) chye pru nga ai.

Jit jep ai hta pru chye ai dat jasat ni,

(I) (Morphin) ေမာ္ဖင္း

(II) (Amfathamin) အမ္ဖက္တမင္း

(III) (Lachyit ) ေဆးေျခာက္ ni law malawng chye pru ai re.

Dai hta Morphin hte lachyit (ေဆးေျခာက္)pru yang gaw ( hpa majaw dai pru ai ngu hpe sakse atsawm sha hkrak lu madun yang) lawt lam naw mai tam ai, raitim amfathamin pru jang gaw nmai lawt mat sai hku re.

(4) Law malawng Myenmung pyada ni galaw chye ai gaw shanhte a masha Informers (shiga jaw ai )ni hpe gumhpraw jaw shangun nna rim mayu ai nta hkan (sh) masha kaw nna Nanghpam tsi mawan, myit galai tsi ni hpe mari shangun nna rim chye ma ai. (SH)

(5) Nanghpam Tsi mawan, myit galai jashai tsi ni ra ai nga nna gumhpraw madun let marai langai ngai hpe sa la shangun ai zawn re ni galaw chye ma ai, dai zawn re ten hta hpa nchye na ai ni gaw gumhpraw hpe sha yu nna shawoi galoi n galaw ga tim dai sa la madun ya ai majaw rim hkrum sha chye ma ai.(SH)

(6) Nang hpam tsi mawan zawn re ni madun nna dut mari lam jahta na matu saw shaga nna rim kau chye ma ai.

(7) Anhte chye da ra ai gaw Pyada ni kadai raitim mung, Warrant (၀ရမ္း) nlawm ai sha (myenmung aten) shana de hkying 6 kaw na jahpawt hkying 6 du hkra, mung masha ni a dum nta de shang gasawk sagawn na ahkang nnga ai. (ျမန္မာနုိင္ငံရဲလက္စဲြ)

* Lahta na aten ni hta mung masha langai ngai a nta kaw shang sagawn tam sawk mayu ai rai yang, nlaw htum Daw lawk masha kaba (sh) mung masha marai 2 lawm ra ai. Dai hku nrai yang dai ten ni hta nta wang de shang na ahkang nmai jaw ai.

(8) Hkrun lam hkawm ai ten hkan raitim label (dazik) n shakap da ai sutdek, htingpa hkan majoi nmai dung nga ai, dai zawn re label n shakap da ai arung arai hkan dung hkrup nna tara nshang ai arung arai ni rawng taw ai rai yang tinang nan lit la ra wa nga ai.

(9) Hkrit ra ai lam langai mi gaw tinang hpe nju ai wa langai mi ti nang a nta wang de tara nshang ai arung arai lama ma kabai bang nhtawm Pyada ni hte ginrun magaw chye ai lam ni mung aten shagu sadi maja ra nga ga ai law.

(10) Informer hpe gaw mu galaw shangun n htawm rim ai ten gaw dai ni hpe bai hprawng kau shangun re ai majaw tinang dai zawn re ni hte sa matut mahkai hkrup ai rai yang gaw tinang hkrum sha na lam sha nga ai law......

( Jinghpaw hku hti yang n manu ai zawn re nhkawn hkrang ai zawn re nga yang chyeju hte bai dinglun hpaji jaw ya marit, ndai lam ni hpe naw matut ka mat wa na re...)

Nawdut

HKRING MI YAW ....,

2009-10-22T22:46:00.001-07:00

- Nji n gu nga, hpawt ni de sawn,

dai na de sawn, yahpang na hpe myit

grai ba la ai law...

- Kalang lang gaw "Green Day" zawn

"Wake me up when september end"

ngu na zawn .....

- Hkring mi,

asim sha mung kan hpe

gan malap da n ga,

chyeju hte,

ngai hte seng ai ni e...

- Hkring mi,

nye myit ni hpe naw

gan shapoi da n ga,

hkring mi ngai hpe

rai hkum jasu mu...

- Poi hkawm nga ai,

poi nga ding yang

hpaw mung nra ai

hpaw mung ntsang ai

- Hkring mi,

ngai hpe gan malap da mu

ngai mung gan malap da nngai

- Ngai naw gan poi hkawm n ga

nbung bung ai de

summwi ni hte rau

hkring mi yaw.

- Ngai grai tsu ai

myit pu ai, myit ru ai,

lam shagu, lam shagu

hkring mi yaw...

- Nang mung gan poi hkawm ai raiyang

nhkrum shi ga,

nang hpe mu yang,

ngai bai dum mat na ra ai..

hkring mi yaw..

ngai naw gan poi hkawm na

MAU SAI, MAU SAI , MAU HPA HKRAI..........

2009-10-10T06:42:00.001-07:00

Kanu yan kawa kaw na shangai wa sai da.

hkrap ai,pawt ai, mani ai, kabu ai,....

dai zawn ,dai zawn....

Masha ni, arung arai ni,

nga yawng nga pra hpe mu sai,

mu ai ,yu ai, mau sai...

Nta hkuwawt hku shinggan de yu ai,

grau mau sai,naw yu mu mayu ai,

nta shinggan pru nna hkan yu ai,

mau hpa hkrai.....

Ndai hku sak hkrung, wo ra hku hkawm sa,

le ra hku myit sawn, htaw ra hku galaw

dai zawn, dai zawn,... hkaja la,

mau sai, mau hpa hkrai....

Lu sha sha ra, arung arai lang ra,

htaw ra galaw ra, le ra galaw ra,

le sa, wo sa, sa sa sa sa......

Sha na matu bungli galaw,

bungli galaw na matu gumhpraw ra,

gumhpraw ra ai majaw, bungli galaw,

bungli galaw na matu lu sha ra..

mau sai, mau sai, mau hpa hkrai....

Dai ra, wo ra, ra hkrai ra,

ra ra ra ra ra she ra ra ra...

Sha ai, ra ai, galaw sai,

byin ai, nbyin ai, chye sai

rai nchye shi ai,

awng dang ai, hkrat sum ai,

mahkrum madup law sai, rai nlaw shi ai,,

Ra ai lam lu sai, rai nhpring ai,

galaw ai, tam ai, lu sai, naw ra ai,

mau sai , mau sai....

Kabu ai , hkrap ai, yawn ai, pyaw ai,,,,

pawt ai, myit ai, sawn ai,

ai ai ai ai ai ai ai ....... mau sai,,,

A ga!

nye a hpraw san ai myit masin

salum hpe naw hkan tam la n ga...

mau sai, mau sai, mau hpa hkrai.....

Nawdut

MUNGKAN HPE SHATSAWM GA

2009-09-23T09:37:00.001-07:00

* Na sumsai hte mungkan hpe shatsawm dat u. nang sumsai hte masawp dat yang pawt sindawng nga ai hkanghkyi pi si mani mat ai.

* Ngai yawn myi prwi hkrat tim na sumsai hpe mu dat yang nye salum mani wa ai.

* Majan pa ka-ang hku na sumsai hte lai wa yang majam pi zim, na myi hte yu dat yang laru kaba mung zim.

* Nang dum shapyaw nga ai dawraw nsen a majaw nammukdara panglai yawng hkra ka nang nga ai.

* Myit n gut na bu hkawm nga ai wangan ni pi na makau du yang mani sumsai rai, kasu gabrawng lahkyik lahkyawk re shara ni nang ladawn da ai ta layung hte ara sha rai mat sai.

* Nang hkawm lai wa ai bum pa layang yawng hta nampan ni pu tsawm nga sai.

* Mungkan hpe jahten na nga machyu pala ni pi na a sama hawm hte hkrum nna katsi pyaw ai bungshi hku mungkan ga de du shang wa ai.

* Si mani ai na nsam madun dat yang grup yin mahkra htoi kabrim nga ai, Na mahku yu ngwi nsen a majaw jut shara shagu simsa ai hka hkin gau zawn.....

* Na sumsai hte mung kan hpe shatsawm dat yu u,,,,,, na tsaw myit hte mungkan hpe shatsawm dat yu u...

NAWDUT BLOG BAI KA NA SAI

2009-09-22T06:12:00.001-07:00

Manaw manang ni e nawdut wa blog nka ai nau na mat ai majaw yawng hpe shawng tawng ban mayu ai law.. myenmung na connection nkaja ai a majaw mung nau nkam shang mat ai mung rai,,, amu loi kyin masu ai majaw mung rai nngai.. hpawt ni kaw na gaw bat mi nlaw htum kalang gaw bai ka na sai ... naw sa chyai dinglun ya marit ngu saw shaga dat nngai law....

Nawdut

AN HKAU NI BRANGLANG DINGLUN JAHTA GA LE ......

2009-06-14T23:59:00.001-07:00

* Kalang lang anhkau ni, anhkri ni online ntsa hta bawng ban jahta ai lam ni gaw jahpyak hkat ai zawn nga mat na re. Rai tim ngai na ningmu hku tsun ga nga yang gaw tinggyang hku tsun hkat ai hku nre sha masa hpe tinang a ningmu hku dinglun ai gaw mai kaja ai lam re ngu mu nngai.

Anhte online kaw shiga ni hpe hti ai, laika ngau ni hpe hti ai, hpaji tam la ai lam ni gaw branglang rai nga ai. dai majaw anhte mung branglang tsun dinglun hkat ra nga ga ai.

Kachin news a comments hte Hkau Shanghtin a blog na ka ngau ni hpe yu ga nga yang KIO hte seng nna adawt nga ma ai... raitim W.P wuhpung kaba rai nga ai majaw anhte mung shawa ni gaw kam ai tsun na re. kam hpa ai majaw tsun ai lam ni mung nga na re. Hpa mi rai rai Yawng gaw Jinghpaw W.P nga yang KIO hpe grau mu mada ai majaw mungkan ting na W.P myu sha ni jawm tsun ai hku rai nga ai.

Ngai mung hpa nlu galaw ai re majaw gaw, kaga shara kaw na KIO a shiga, masa ni hpe madat taw nga ai hta lai hpa nan nlu galaw nngai. raitim kaga kaw na tinang mu ai hpe gaw tsun mayu ai, ka mayu ai, jahtau mayu ai. ngai tsun na ngai ka na ngai jahtau na mung ngai hpa nlu sha, nlu su wa ai. Dai zawn sha anhte a laknak hpai ai wuhpung ni hpe gaw mung masha ni dinglun ai lam , shakawn ai lam, tsun dan ai lam ni gaw nga taw na sha re.

Hkarak dik hte mai kaja dik gaw Hkau Shanghtin, Hkau BrangMai hte Kachin news hti manang ni yawng e anhte hpa nlu galaw tim ningmu ni hpe gaw branglang dinglun jahta ga ngu nna hkung ga let saw shaga dat nngai law.

*  Kachin news na KIO hpe hkrai nau n jahpyak ga nga ai comment hte http://shanghtin.blogspot.com/ kaw na Ga San Ga Htai nga ai ni hpe mahta nna nye a ningmu hpe ka mara dat ai law...

Yawng hpe hkungga let....                 Nawdut

DE .... WUNPAWNG BRANG ZET

2009-06-04T07:21:00.001-07:00

Ninghkaw jan lagaw gaw W.P brang a myi hpe hpaw hkra n jasu nu ga, W.P brang mahtang she lahpyaw nsen hte ninghkaw jan hpe sinpraw maga na gang shapraw dat na sai..

Manap e, U la goi ai nsen a majaw, W.P brang n kajawng u ga, W.P brang a yungwi nsen a majaw she U la kajawng nna goi dat nu.

Jahpawt manap shagu jan pru wa ai hpe, nta ndaw kaw salat ni lwi let, la mada yu yu di yang, W.P brang ni a arawng sadang dan pru wa na ra ai.

Jan shang wa ai gaw sadi jaw ai hku nhkam la ra nu ga, W.P brang mahtang she nta wa na mahka, ninghkaw jan hpe sinna maga de htu bang kau da na nngai.

Aten nnga ai ngu nna shakyin shatu rai, brang wa nkyin hkawm sai, ahkying aten ni mahtang W.P brang ni hpe hkrit hkung ga nga manu ga.

Nang hpam lu sha hte pyaw hpa lam gaw W.P brang ni hpe masha shinggan de n shapraw kau lu na, Anhte mahtang she nkaja ai lam hpe myu sha ni hta na gawt kau ga.

Masha ni gaw anhte hpe matsan dum ai hku n yu nu ga, anhte W.P brang ni mahtang mungkan gaw hpe daw jau yu saga.

W.P shayi sha ni a tsawm shingni gaw, W.P brang ni hpe arawng shatsaw ya ai hku nre sha, W.P brang ni a nyan hpaji, n gun atsam hta W.P shayi ni a tsawm shingni gaw shim lum nga u ga.

Ngai W.P brang hpe magam bungli ni n gamyet nga ai sha, magam bungli ni a ntsa e dung let hpareng hparan nga na re.

W.P mungdan gaw W.P brang hpe woi dun la ai hku nrai, W.P brang zet she W.P mungdan hpe makawp maga nga u ga.

Shata shagan ni hpe dawng mada let, W.P brang ni yu myit kaji, myit garen nga na nrai, W.P brang ni hpe dawng mada nna shata shagan ni n gun la nga mu ga law…..

nawdut

GU DUT A NGAI NAM SHANUT

2009-05-15T09:31:00.001-07:00

Shamying da ai gaw Gu Dut
Masha hpe mu yang gaw chyamut,
Internet Café hkan sa chyai
Gumhpraw gaw nlu ai.

Laika gaw hkrup mara ka
Majoi hkan chya pa,
Dung yang gaw shingjut
Mayen pi she ma- ut.

Ngai nam ni hpe tsun mayu ai,
Online kaw nau rawng madai,
Tsun chyai ai hku she re law
Ngai nam ni hpe hkau na yaw.

Chatting hku she jahta chyai na
Nau dung jang gaw hpang de nau pa,
Tsun yang gaw myu tsaw myit kaba
Ra ai gaw ladi galu ai gala.

Sumtsaw gaw bai hkan kyep
Nau hkum se ma hkalep,
Make-up nau hkum chya
Gala la ni ra mat na.

Prat dep ai she re Gu Dut
Prat hpaji hpe gaw n shachyut,
Maigan gu ni chat dat yang
Kabu myit hte bai hkan gang.

Online kaw hpaji sa la
Nu hpe gaw masu tsun da,
Du ai hte gaw chatting
Gu ni a ID hpe matsing.

Kade nna yang myiset ra
Prat hpaji hpe shakut nna da,
Email she bai chek yu na
Hti mayu ai gaw sumtsaw laika,

Lung lung ai gaw dakkasu
Gu the jahta na pi grau saku,
San poi hkrat tim yau sai nga
Gu the grau pi lu run na.

Hkahku labu hte lai lai
Banau bat gaw wai wai,
Jinghpaw shayi sumsai shingni
Nu gaw myit li, yawng gaw yu si,

Nau hte tsun jaw yang
Pawt mat na gaw tsang,
Pawt gaw hkum pawt law
Gu Dut tsang ai yaw,

Ngai nam ni maigan hpang hkan mat ai shaloi
W.P Gu brang ni sha yawn la dik ai oi….

Nawdut

ONLINE NA J.W MUNGDAN

2009-05-15T09:26:00.001-07:00

Amyu shadang ni e, amyu shayi ni e ndai zawn re branglang mungkan masa hta anhte Online du nga sai, hpang e du wan a J.W myu sha ni hku nna mungdan langai shachyaw yu ga oi.. Lamu ga hku masat ai, ahkaw ahkang hku masat ai zawn re lam law law hku masat ai mungdan rai nlu shi tim, online kaw gaw J.W mungdan langai mai shachyaw nga saga ai. Anhte hta Jinghpaw ga the moi jiwoi jiwa ni galaw masat day a ai Jinghpaw laika ngu ai nga sai majaw mai galaw na re ngu kam ai. Ya mung anhte yawng gaw de nga ga ai ngu mu mada nngai.

Jinghpaw laika shawng shachyaw hpang yu ga. J.W myu sha ni hta nlaw htum 0.5% the 1% ( ngai hkrai maram yu ai sha re) daram gaw online shang sai ngu ga. Shang ai ni yawng hkra tinang a ningmu ni, tinang chye ai hpaji, shiga, sumroi, sumrai, ga shagawp, …… hpan amyu my hpe J.W laika hku mara da yang gaw hpan hkum ai, ningmu hkum ai Jinghpaw laika dum kaba online ntsa kaw lu shachyaw da na re. Kaning re sha mi ka mara da tim Jinghpaw laika hku ka mara da yang gaw mu hti hkrup ai ni a matu lama ma sha pi lu la nhten ngu mu nngai. Dai majaw Online shang ai Jinghpaw W.P myu sha yawng lama ma sha gaw ka mara na matu, ka mara taw nga sai ni kaw lit nga na re. Nkau mi shani shagu, nkau mi shata shagu, nkau mi bat shagu, nkau mi kalang nrang rai gara hku mi ka ka, ka na gaw grau ahkyak nga ai law.

Kaning re mungdan hpe ra nni? Gai bawng ban yu ga, hpa baw the seng ai lam, wang lu wang lang , brang lang tsun jahta ga. Mungkan jut shagu na ni J.W laika hku tinang a ningmu tsun yu ga, tinang chye ai lam tsun yu marit. Myi man nmu hkat tim sut masa bawng ban shara, hpaji masa jahta shara, lam amyu myu bawng ban hpaji jaw dinglun shara ni nga ai rai yang gaw anhte mungdan shachyaw hpang nga saga ai. Lama na Jinghpaw mungdan lu sai nga nna yawng gaw sinna htunghking , lailen lang ai mungdan hpe ra ma ni? Myen ga , English ga, Miwa ga shaga ra ai J.W mungdan hpe ra ai i? America laika lang ai J.W mung dan i? ya nan anhte daw dan yu ga. Ndai gaw lamu ga masat nna lu ai Mungdan a matu sawn yu ra ai lam rai sa.

Online hta gawgap na J.W mungdan gaw kaning re hpe lata na
(a) Anhte mu ai ningmu, sawn hpan lam, machye machyang , anhte a lailen, baw nu ni hpe online hta du nga ai kaga amyu ni lu hkaja chye lu mu lu hkra kun?
(b) Masha ni a machye machyang, bawnu, hpaji, sawnhpan lam, kungkyang lam ni hpe online hta du nga ai J.W my sha ni mu lu chye lu hkra kun?
Mai kaja dik htum ai gaw lahta na ga san 2 yen hpe gumhpawn nna J.W my sha ni mu lu chye lu hkra galaw na gaw Online hta du nga sai myu shayi shading ni a lit rai sai.

Online shang ai J.W myu marai sen mi (100000) rai yang dai yawng the hpan amyu myu, masa lam amyu myu, lam shagu hpe Jinghpaw ga hku tsun, Jinghpaw laika hku ka mara, Jinghpaw hku hpaji jaw dinglun hkat rai yang gaw Online hta J.W mungdan langai gaw gap da ai rai na sai law……

Nawdut

Saw shaga ai lam - Jingahpaw hku mara da ai Website ni hpe mu hkrup, tam hkrup yang lawu na hkring dat hta sa da ya marit . J.W website matsun madun laika hpe mayun shapraw hkyen nga nngai.

HKUM KATA NA SAI MAKA

2009-04-11T22:29:00.001-07:00

Kalang lang American hku nga
Indian nsam sam
Enlish ga shaga
Frence malu masha she ra
"Mr. John Naw da"

Hkum kata na sai hpe shaw,
Kaning re maka kun ngu
Jak hpan amyu myu hte hkraw yu ga

Umm... Umm... Mali hka gaw naw lwi nga ai,
sai kata hta manau nau ai nsen loi loi naw na,
Aw le le, Aw ra ra nga,
ndum shami kahtan pru wa wa re

Kalang lang Korea sumsai hte,
Thai yungwi sha mi ngoi,
spain hku ka manawt dat
Japan kaw nga ai,
"Ms. Kim Song Ja" da.

Hkum kata na sai hpe shaw
kaning re maka kun ngu
Jak hpan amyu myu hte hkraw yu ga

Aww... Umm... Htawng ka naw ka nga ai.
Soi palawng ngoi ai nsen naw na nga ai,
naw hpu bat gaw wai wai naw manam sa.

Aga... ngai mung computer lang,
grai "lan" ai "atele" ni a makau kaw
"kun ya" sha mi maya kau
Shan pants bu da di
"ahyen mike dae, Ko Sai Brang" da.

Hkum kata na sai hpe shaw
kaning re maka kun ngu
jak hpan amyu myu hte
naw wa hkraw yu na re....

Jinghpaw Blogger nnan langai bai jat sai...

2009-03-11T20:45:00.001-07:00

Thailand mungdan CM kaw na Jinghpaw Wunpawng shayi sha langai dai kaw jawng lung let kapaw dat sai da... dai kapaw dat ai ni hpe sa kapaw lawm mayu yang http://htahkrup.blogspot.com/ ndai kaw nta kaw re... anhte yawng mung kabu gara hkap tau la ga ngu W.P blogger manang ni hpe shana mayu ai lwi...

Shi ka da ai Maubyin ni, kangau ni mung ram ram dai ai she rai nga ai... ndai zawn Jinghpaw W.P blogger bai jat wa ai majaw mung grai kabu ai law... CM kaw na shi lung ai jawng a lam ni hpe san mayu yang mung san la yu ga le i...

MAI KAJA AI GALAW YANG.....

2009-03-11T20:22:00.001-07:00

* Mai kaja, ai galaw ai majaw Karai Kasang anhte hpe tsaw ra ai nrai, Karai Kasang anhte hpe tsaw ra ai majaw she mai kaja ai galaw ging nga ai..

WANJANG KAMUNG hta Numsha hte discussion galaw ai kaw na human right hte seng ai lam ni...

2009-02-25T06:26:00.001-08:00

Human Rights hte seng ai Law gaw ndai Myen Mung kaw lak san nra ai ngu mu mada ai le....hpa majaw nga yang penal code hte spacial laws ni hpe hkrak hkrak jeyang daw dan, ahkyak la ai rai yang human rights hpe hkan ai hte maren sha re.. International Law gaw grai dam lada ai .. (lama mi hku nga yang anhte ta tut nlang byin ai majaw nau nchye sang lang dan ai..) Myen Mung kaw mung tara dara ai lam gaw loi jaw ai(Myen Mung kata na matu), raitim mai lawt ai case ni gumhpraw ma yang she mai lawt taw ai.. nmai lawt ai case ni rai tim, tara kasa ni sumrai zawn manai makai chye yang gaw mai lawt na lam nga ai.. Kalang lang tara rung kaw , shinggan kaw teng byin ai hku nlu jep shapraw ai lam gaw gara mung dan kaw mung byin chye ai ngu chye lu ai. Raitim teng man ai ni a matu gaw gara kaw mi rai rai mai kaja tengman ai lam gaw pru wa na sha re (na ai/ nna ai sha shai na re) ngu mu mada nngai ... anhte ndai lahta Sammung kaw case ni hkan ai ten hta rai tim kaja wa nshut ai wa a matu gaw laksan sawn na me nra, Law hte hkrak sa yang gaw amu dang na lam sha re ... hpa mi nga nga mang hkang byin nna pyada dap, tara rung du yang gaw gumhpraw ma ai sha re ngu .....

TARA JEYANG AI LAM GAW (sh) SAU DI BU

2009-01-21T00:13:00.000-08:00

* Tara rung ni hta tara jeyang ai ngu gaw sau di bu hte bung ai ngu mu mada nngai. Tara ra (တ၇ားလုိ) maga de na gaw "DI BU", waw ai hku ni mahkra hpe hkan kapa nna. Tara hkam (တ၇ားခံ) maga de na gaw "SAU" waw ai hku tam nna nlu lu hkra pru na rai nga ai.

* Dai majaw tara kasa ngu ai ni gaw DI BU kapa ai ni (sh) hku tam ai ni rai nga ai ngu lachyum shaw yu nngai lwi...

U DI KAWP

2009-01-20T23:58:00.000-08:00

* Udi kawp ngu ai gaw maza rai nga ai. U hkai kasha kraw wa na matu gaw udi kawp ga ayai hkam ra ai. Kadai raitim U hkai kasha chyu byin mayu na re. U hkai kasha kraw ai shaloi ga ayai ra ai udi kawp gaw kadai nkam byin na re. Raitim Udi kawp nnga yang Uhkai kasha asak hkrung na matu nmai byin ai.

* U di kawp gaw teng teng ga ayai na sha rai nga ai. Anhte hta Udi kawp kadai tai ya na, Uhkai kasha gaw kadai ni ta? U di kawp n ga yang u hkai gaw nmai kraw, kadai mung u hkai kasha a shara hta sha byin mayu, kadai ga ayai ya na ... U di kawp .. U di kawp....

HKUNGRAN HKUNGRA LAM (Of Offences Relating To Marriage )

2009-01-20T23:40:00.000-08:00

Section 494; Kadai raitim, asak naw hkrung nga ai madu wa mi rai, madu jan mi rai naw nga yang hpang kalang mi bai hkung ran ai shaloi, dai madu wa mi rai, madu jan mi rai asak hkrung nga ai majaw hkungran lam n grin ai lam hta, hpang kalang kaga bai hkungran yang dai wa hpe 7 ning du hkra bawng dam lama ma jahkrat ra ai hta n ga gumhpraw dam mung jahkrat lu ai.

Exception ; Shawng nnan na hkungran ai lam gaw jaw hkrak tengman ai lam nre ngu jep jeyang na ahkang nga ai rung kaw nna jeyang daw dan ai rai yang ndai section hte nseng lu na.

Lahta na madu wa timung, madu jan timung asak hkrung ai laman, hpang kaga bai hkungran ai lam hta, dai madu wa gaw (sh) madu jan gaw (7) ning tup ndu wa ai rai yang, dai ten ni hta mung madu wa (sh) madu jan asak hkrung let naw nga ai lam nna ai rai yang mung, hpang kaga hkungran na wa hpe tinang chye na lu ai lam ginlam, teng man ai hpe tsun dan ai rai yang mung, ndai section hte nseng lu na.

HKUNGRAN YA AI WA (SH) GARUM MADI SHADAW AI WA

Section 109; Marai langai ngai a garum madi shadaw ai a majaw dai garum madi shadaw hkrum ai wa a galaw ai lam lama ma ngut kre ai lam hta, ru hka dam hpe ndai PENAL CODE hta dan dan leng leng shadan matsun da ai lam nnga yang tawt lai ai madung ruhka amu a shadan matsun da ai ruhka dam hpe jahkrat ra na.

Sang lang ai lam : Shadut ai majaw mi rai, ginrun lajang ai majaw mi rai, garum madi shadaw ai lam ngut kre hkra garum ai majaw mi rai, galaw ai lam mung, ruhka amu mung byin kre ai rai yang dai galaw ai lam gaw (sh) dai ruhka amu gaw garum madi shadaw ai a majaw re ngu na.

ARUNG ARAI HPE MAKAWP SHINGDANG NA AHKANG BYIN PRU HPANG WA AI SHALOI HTE MATUT GRIN NGA NA ATEN MASAT (Commencement and continuance of the right of private defence of property )

2009-01-14T06:13:00.000-08:00

Section 105; Arung arai hpe makawp shing dang na ahkang gaw arung arai hpe hpyen byin shangun na zawn re myit tsang hpa byin ai lam pru wa ai ten kaw na hpang ai.

* Lagu ai lam hta arung arai hpe makawp shingdang na ahkang gaw ruhka amu tawt lai ai wa gaw lagu la mat wa ai arung arai hte rau pru mat wa ai du hkra (sh) mung shawa magam gun arawng aya lu ai ni a karum shingtau ai hpe lu la ai du hkra (sh) arung arai hpe bai lu la ai du hkra matut grin nga ai.

* Kashun la ai lam hta arung arai hpe makawp shingdang na ahkang gaw ruhka amu tawt lai ai wa gaw marai langai hpe asak si hkra mi rai, machyi hkra mi rai, n tara ai hku shingdang ninghkap ai mi rai galaw nga ai ten mahkra (sh) galaw na dating shakut nga ai ten mahkra (sh) kalang ta si hkrum na re ngu mung, kalang ta machyi hkrum na re ngu mung, kalang ta tinang nan rim dip hkrum na re ngu mung hkrit tsang na daram rai tawt lai ai wa gaw dai zawn galaw ai ten mahkra hta matut grin nga ai.

* Ruhka dam jaw ging ai lai shang ai lam (trespass ) hta (sh) akyu jahten ai lam hta arung arai makawp shingdang na ahkang gaw, ruhka amu tawt lai ai wa gaw ruhka dam jaw ging ai lai shang ai lam hpe (sh) akyu jahten ai lam hpe tawt lai nga ding sa, aten mahkra matut grin nga ai.

* Shana hta nta kata waw shang ai lam hta arung arai makawp shingdang na ahkang gaw ruhka amu tawt lai ai wa gaw nta kata waw shang ai hte hpang ai, nta kata laishang ai lam tawt lai nga dingsa aten mahkra matut grin nga ai.

Akyu jahten ai - mischief

Nta lai shang ai - house trespass

lagu ai - theft

Masha hkum hte arung arai ni hpe makawp maga shingdang na ahkang ( The right of private defence ) gaw ndai hte rai sai.. ndai kaw sa du ai manang ni hku nna ndai law ni hpe Jinghpaw hku gale da ai lam hta, gasi lang ntsawm ai lam (sh) hti yang nmanu ai zawn re ni nga yang chyeju hte alu sha dinglun hpaji jaw ya na hpe saw shaga let garum hpyi dat ai law

MAKAWP SHINGDANG NA AHKANG Section 104,106 (The right of private defence )

2009-01-14T05:49:00.000-08:00

Section 104; Marai langai ngai gaw matut manoi rai nga ai lahta na section hta shadan da ai ruhka amu zawn nre ai lagu ai lam, akyu jahten ai lam, ruhka dam jaw ging ai lai shang ai lam lama ma hpe tawt lai yang (sh) tawt lai na matu dating shakut yang dai wa hpe asak si na hku kadai raitim tinang nan arung arai hpe makawp shingdang na ahkang nga ai. Raitim section 99 hta shadan da ai lam ni hpe shamyet nna, dai nkaja ai lam galaw ai wa hpe asak si ai daram nre sha kaga machyi na matu kadai raitim tinang nan arung arai hpe makawp shing dang na ahkang nga ai.

Section 106; Asak si na daram re myit tsang hpa lata du ai lam hte hkrum yang, makawp shing dang na ahkang hpe lang ai shaloi, makawp shingdang ai wa gaw, mara nnga ai wa hpe n hkra yang makawp shingdang na ahkang nlu na zawn re ten hta, dai mara nnga ai wa hpe hkrit tsang hpa hkrum hkra na lam nga tim tinang hta makawp shingdang na ahkang nga ai.

Ga shadawn ; A hpe B ni law dik hkra nhtu nhkyi ni hte adup na matu wang da ai rai yang A gaw makawp shing dang na matu sinat hte gap na ngu tim makau kaw yu nga ai mara nkap ai ma kaji ni kaw hkra na tai, n makawp shing dang yang gaw tinang a asak hkra na tai re ten hta, sinat hpe gap let makawp shingdang na ahkang nga ai.

MAKAWP SHINGDANG NA AHKANG Section 101,102,103 (Of the right of private defence )

2009-01-13T04:37:00.000-08:00

Section 101; Matut manoi re lahta na section hta shadan da ai ruhka amu ni hta na langai ngai hpe tawt lai ai nrai yang, dai galaw ai wa hpe asak si hkra, kadai raitim tinang nan masha hkum hpe makawp shingdang na ahkang nnga ai, raitimung section 99 hta shadan da ai masat tara ni hpe shamyet shanat nna, hpyen galaw ai wa hpe asak si hkra re ai hta lai nna kaga machyi hkrum hkra, kadai raitim tinang nan galaw let masha hkum hpe makawp shingdang na ahkang nga ai.

Section 102; Ruhka amu shuthpyit tawt lai ai lam nnga shi ai raitim, shuthpyit tawt lai na matu shakut taw ai mung, jahkrit shama taw ai mung, masha hkum hpe hkrit tsang hpa machyi jahkrum na hku myit tsang na zawn re lam ni pru wa sai kaw nna, masha hkum hpe makawp na ahkang gaw pru hpang wa ai. Dai hta n ga dai zawn hkrit tsang hpa myit tsang na zawn re lam ni matut nga ai aten mahkra masha hkum hpe makawp maga shingdang na ahkang mung matut nga nga ai.

Section 103; Lawu na ruhka amu ni hta na ruhka amu langai ngai hpe galaw na matu tawt lai ai rai yang (sh)tawt lai na matu dating shakut yang, section 99 hta masat shadan da masat ni hpe shamyet nna, dai galaw ai wa hpe asak si hkra mung, kaga hku machyi hkrum hkra mung kadai raitim tinang nan arung arai ni hpe makawp shingdang na ahkang nga ai...

I. Kashun la ai lam

II. Shana aten hta nta kata waw shang ai

III. Masha nga na matu mi rai, arung arai zing tawn na matu mi rai jai lang ai dum nta zawn re hting tsip, ginsum, hkaleng lama ma hta tawt lai nna wan hte akyu jahten ai lam

IV. N makawp n shingdang yang asak si na zawn re (sh) laja lana machyi hkrum na hpe myit tsang na daram re tawt lai nna lagu ai lam (sh) akyu jahten ai lam (sh) nta lai shang ai lam.

Kashun la ai - Robbery

Shana aten nta kata waw shang ai - House- breaking by night

htingtsip - building

ginsum - tent

hkaleng - vessel

An... MYI MAN HKRUM RAI TSAN GANG NGA

2009-01-13T04:24:00.000-08:00

Ngai sa wa na...

ya jang sa wa na,

Htaw... grai naw tsan ai kaw na,

shi ngai hpe mani let hkap tau nga ai.

Ngai mung matut hkawm let

shi myiman nsam hpe

mu na daram rai yang,

Shi sumsai rai ngai hpe yu nga ai,

ngai mung matut hkawm sa let,

Je hte je grau grau shi hte ni wa sai

Ya!... shi a shawng kaw ngai du,

myiman hkrum rai,,, ngai baw gum let tsap

Myit mada lam law law hte,

angwi ngwi sha nge baw hpe sharawt nna,

shi a myiman hpe yu dat yang....

MASHA HKUM HPE MAKAWP SHINGDANG NA AHKANG GAW KANING RE TEN HTA MASHA SI AI DU HKRA MAI GALAW AI LAM (When the right of private defence of the body extends to causing death )

2009-01-11T00:44:00.001-08:00

Section 100; Lawu na madun da ai ruhka amu ni hta na ruhka amu langai ngai hpe galaw shyt hpyit tawt lai ai rai yang, matut manoi re lahta na Section hta madun ai masat tara ni hpe shamyet shanat la let, dai shut hpyit lam galaw ai wa hpe asak si na matu mung, kaga hkrit tsang hpa langai ngai byin shangun na matu mung, kadai raitim tinang nan masha hkum hpe makawp shingdang na ahkang nga ai.

I : N makawp n shingdang yang, asak si ai de du shangun na matu myit tsang hpa byin na daram re ai lata du ai lam,
II : N makawp n shingdang yang, laja lana machyi hkrum na zawn myit tsang na daram re ai lata du ai lam,
III: Ngang roi rip na matu myit nna tawt lai ai lata du ai lam,
IV : Ngang a mayu ai myit hpe shapyaw lu na matu, shingra tara hte shai ai hku galaw na matu myit let tawt lai ai lata du ai lam,
V : Masha hpe lagu la na myit let mung, lau la rim woi la na matu myit hte tawt lai ai lata du ai lam,
VI : Lawt lam lu na matu, mung shawa magam gun ni hpang de shana na aten ahkang nnga ai ngu, myit tsang na daram re hpe byin shangun ai hpang marai langai ngai hpe n tara ai hku rim gyit da na myit hte tawt lai ai lata du ai lam.

Ngang roi rip ai - rape
Lata du ai lam - assault
Laja lana machyi hkrum na - grievous hurt
Shingra tara hte shai ai - unnatural
Lau la rim woi la ai lam - Kidnapping (or) abducting

****( Myanmar The Penal Code kaw na ga gale da ai re.. Section ; 101, 102, 103, 104, 105, 106 ni hpe mung matut na bai gale mara dat na re ngu nna ... Nawdut )

MAKAWP MAGA SHINGDANG NA AHKANG UPADI, Section 99 ( The right of private defence, Section 99 )

2009-01-11T00:09:00.000-08:00

Section 99; Asak si na matu mung, asawng awawng rai hkra re machyi shangun na matu mung, myit tsang na daram re lam nre sha galaw ai lam hpe mung shawa magam gun wa gaw mung shawa magam gun hku nna jaw ai ngu hkam la nna galaw ai rai yang (sh) galaw na matu shakut ai rai yang, dai zawn galaw ai lam, shakut ai lam lama ma hta Upadi hta galaw na ahkang hkrak zeng dan dan ai lam nnga ai raitimung, dai galaw ai lam, shakut ai lam lama ma hpe shingdang na matu makawp shingdang na ahkang nnga ai.

* Asak si na matu mung, asawng awawng rai hkra re machyi shangun na matu mung myit tsang na daram re lam nre sha galaw ai lam hpe, mung shawa magam gun wa gaw mung shawa magam gun hku nna jaw ai ngu hkam la nna matsun maroi hte maren marai langai ngai galaw ai rai yang (sh) galaw na matu shakut ai rai yang, dai matsun ai lam gaw Upadi hta galaw na ahkang hkrak zeng dan dan ai lam nnga ai raitimung dai galaw ai hpe shingdang na matu makawp shingdang na ahkang nnga ai.

* Mung shawa magam gun arawng aya lu ai ni kaw na makawp maga, garum shingtau ai lam lu la na matu shana na aten nga ai aten, ahkaw ahkang lu ai rai yang makawp shingdang na ahkang nnga ai.

* Makawp shingdang ai shaloi makawp shingdang ai hku nna machyi shangun na matu hta ra ai hta jan nna galaw na ahkang nnga ai.

Sanglang ai lam 1. Mung shawa magam gun wa hku nna galaw ai lam, (sh) galaw na matu shakut ai lam gaw mung shawa magam gun re ngu galaw hkrum ai wa nchye yang (sh) kam na zawn re nnga yang, dai wa gaw mung shawa magam gun a galaw ai lam hpe (sh) shakut ai lam hpe shingdang na matu makawp shing dang na ahkang nga ai.

Sanglang ai lam 2. Galaw ai wa gaw mung shawa magam gun langai a matsun hte maren galaw ai hpe mung, shakut ai hpe mung galaw hkrum ai wa nchye yang (sh) Kam na daram re ginlam nnga yang (sh) Kaning re arawng aya hte galaw ai lam, galaw ai wa ntsun dan ai rai yang (sh) arawng aya hpe laika hte jaw da hkap la la ninglen, dai laika hpe hpyi yu ai shaloi n madun ai rai yang, galaw hkrum ai wa gaw dai mung shawa magam gun a matsun hte maren galaw ai hpe (sh) galaw na matu shakut ai hpe shingdang na matu makawp shingdang na ahkang nga ai.

Sanglang ai lam - Explanation

Mung shawa magam gun - Public servant

Hkrak zeng dan dan ai lam - Strictly justifiable by law

MAKAWP MAGA SHINGDANG NA AHKANG UPADI, Section 96,97,98( The right of private defence )

2009-01-10T23:54:00.000-08:00

Section 96; Makawp maga shingdang na ahkang hte maren galaw ai lam gaw ruhka amu nbyin ai .

Section 97; Section 99 hta lawm ai masat tara ni hpe n ninghkap ai sha kadai raitim,
I. Masha hkum hpe machyi hkra tawt lai ai ruhka amu hpe makawp shingdang na matu, tinang hkum hte kaga masha a hkum hpe makawp maga shingdang na ahkang nga ai.
II. Lagu ai lam (sh) kashun kashe ai lam (sh) akyu jahten ai lam (sh) ruhka dam jaw ging ai tawt lai ai lam mung, dai zawn ruhka amu hpe tawt lai na matu shakut ai lam hpe mung, makawp na matu tinang madu ai mi rai, kaga masha madu ai mi rai htawt sit lu ai arung arai ni hpe (sh) nhtawt sit lu ai arung arai ni hpe makawp maga shingdang na ahkang nga ai.

Section 98; Galaw shut hpyit lam gaw asak kaji ai lam, myit sawn hpan rai nhkum ai lam, sai n gu ai lam, nang hpam ai lam, ginlam hpe jaw ai hku nchye ai lam lama ma a majaw sha dai galaw shut hpyit ai lam hpe galaw ai wa a matu ruhka amu nbyin shi ai raitim, kadai raitim dai galaw shut hpyit ai hpe shingdang na matu ruhka amu du ai galaw shut hpyit ai lam rai sai hku nna makawp shingdang na ahkang nga ai.

Sai n gu ai lam - the unsoundness of mind

AWNG DANG LAM LU LA AI HTA GRAU AI NI

2008-12-11T05:53:00.000-08:00

* Nu yan Wa gaw mam hkai, hkau na galau rai,
anhte a nta sangu hte galup,chyinghkyen hkumba kum,
nawhpu shat mai sha let
grai na sai.... dai zawn....

* Awng dang lam lu la ai wa da,
ngai hpe tsun ma ai..
masha ni law law hkungga la ra di,
ngai mung madang tsaw dum ai ga si ni hte,
ngai lai wa yang masha ni law law
baw gum ma ai...
ngai gaw ding ding yu nna
masa ai myi man nsam shachyaw gun...

* Nu yan Wa gaw sun chye, nsi nai si hkai rai..
du hkra ladaw ni law law lai ...
dai zawn ... dai zawn ... grai na sai...

* Hkungga ging ai masha re da..
ngai hpe tsun ma ai,
awng dang ai prat hpe madu lu nit dai da,
ngai hpe shakawn ma ai,
ngai mung arawng la ai nsam hte
masha law law mau ai ka ngu ni hpe lang let...

* Nu yan Wa gaw
sangu nta ntsa e tu kabrim nga sai,
shagan ni hpe yu let,
kabu myi prwi pru masai..
kalang lang shagan ni hpe magra jum la rai
masin salum rawng ai sinda kaw
shakap da da rai ma ai...

* Grai byin ai, awng dang ai wa da
ngai hpe tsun ma ai...
Wa! ngai mung nang zawn di
shagan hpe magra jum mayu ai,
Nu! ngai mung nang zawn di
nta ntsa e tu kabrim ai
shagan ni hpe mada yu let
kabu myiprwi pru mayu sai....

MA KAJI UPADI (Child law )

2008-12-07T00:41:00.000-08:00

Section 66; Kadai raitim lawu na shut hpyit ai lam langai ngai hpe tawt lai ai lam ruhka amu dan leng je yang hkrum yang, dai wa hpe bawng dam (2) ning du hkra mi rai, gumhpraw dam lap 10000 du hkra mi rai, dam lahkawng yan mi rai jahkrat ra na.

(a) Tinang uphkang yu lajang ai npu na, asak 16 ning rai nhpring ai num kasha gaw shawa num hku kanbau bungli galaw nga ai hpe chye ninglen kau sharap (kabai tawn) da ai lam

(b) Tinang uphkang yu lajang ai npu na ma kaji hpe shawa num/la hku nna kanbau bungli galaw sha nga ai wa hte arau nga na matu (sh) rau hkawm rau sa kanawn mazum na matu ahkang jaw ai lam

(c) Tinang akyu ara a matu ma kaji hpe hpyi yawn sha shangun ai lam, tinang uphkang yu lajang ai npu na ma kaji hpyi yawn sha nga ai hpe nhkum shingdang ai lam, tinang hpyi yawn sha ai hta ma kaji hpe lama ma hku jai lang ai lam,

(d) Kanu kawa, sara (sh) uphkang yu lajang na ahkang nga ai wa, myit su na matu sharin shaga ai zawn re hta lai nna, ma kaji hpe da sang adip arip zingri ai lam

(e) Ruhka amu tawt lai nna hkang da ai ma kaji (sh) manghkang amu langai ngai hta sakse hku nna lawm ai ma kaji gaw kaning re, kadai re ai lam hpe dan leng na zawn re shiga ginlam ni hpe seng ang ai ma kaji tara rung a tau hkrau ahkaw ahkang nlu ai sha, Radio, sumla hkrung, Television, shi laika, magazin, journal (sh) laili laika ni hta bang shapoi ai lam, ndau a lam, ma kaji a sumla hpe madun shapoi ai lam , jai lang ai lam

(f) Ma kaji hpe awu asin re sumla hkrung, vedio, television (sh) sumla dem ai lam.

Section 71 ; Grin nga dingyang Upadi langai ngai hta kaning nga ai mi lawm ai raitim,

(a) Ma hpe si dam (sh) prat mi bawng dam jahkrat ai lam n galaw lu na.

(b) Ma hpe bawng dam jahkrat yang law dik htum (10)ning hta njan lu na.

Shawa num galaw sha ai lam - prostitution
Hpyi yawn sha ai lam - kumyawn, mawhpyi
Asak 16 ning a lawu - Ma kaji
Asak 16 ning hte 18 ning lapran - Ma

DE...... NUMRI PAN NGU AI ......

2008-12-07T00:25:00.000-08:00

* Si mani let, sumnung shingdi...
tsawm hpraw nsam hte,
manu dan dik hpu htum
numri pan Wunpawng shayi e...

* Dai nampan pu tsawm nga ai
manam hawm la nga ai,
hkinlung nna naw kabrim nga,
dan dan leng leng rai...

* Yu ra ai ni kadai mung,
mai di la ntaw?
nang kaw ju nkap i?
sama hawm ai hpe, kadai mung,
loi loi sha mai marawp yang,
numri pan jet jet nrai
ju nkap ai numri pan,
ngu nngai... nga ma ai...

* Lam ntsa hkan,
majoi pu taw ai me nrai...
Ra ai ni kadai tim,
hkrup mara me nmai di kai,
manu dan ai, tsawm dik sai..
ju kap lit dai,
dai Numri pan ngu ai
Wunpawng shayi rai sai....

MA KAJI UPADI ( Ya grin dingyang Myenmung Upadi )

2008-12-05T04:42:00.000-08:00

Section 65 ; Kadai raitim lawu na shut hpyit tawt lai ai lam langai ngai hpe tawt lai ai lam ruhka amu danleng je yang hkrum ai rai yang, dai wa hpe bawng dam shata (6) du hkra mi rai, lap 1000 du hkra mi rai, dam lahkawng yan mi rai jahkrat ra na.

(a) Ma kaji a asak hpe hkrit hpa shoi hpa hkrum shangun ai (sh) ana zinli kap hkra shangun ai (sh) kyang lailen hten za shangun ai amu hpe shangun ai (sh) galaw na ahkang jaw ai.
(b) Tsa, chyaru hpe laksan dut ai shara de ma kaji hpe woi shaga sa ai lam (sh) du shang na ahkang jaw ai lam, Ma kaji hpe tsa chyaru mari shangun ai lam, dut ya ai lam, tsa chyaru lu na matu ahkang jaw ai lam, tsa chyaru dut mari ai bungli hta mu shangun ai lam (sh) mu galaw na ahkang jaw ai lam.
(c) Ma kaji hpe hpai da ginsup na matu shadut ai lam, hkalem lau la ai lam (sh) n gun jaw garum shingdau ai lam,
(d) Ma kaji kaw na arung arai lama ma hpe rai shadun hkap la ai lam, Ma kaji arung arai shadun ai hpe ladat lama ma hku n gun jaw garum ai lam,
(e) Mai kaja ai kan bau bungli hku gat dut ai Ma kaji kaw na arung arai mari ai hta lai nna, Ma kaji dut ai arung arai lama ma hpe mari ai lam,
(f) Ma kaji langai hpe sharin jawng, ginra, yu lajang zinlum ai shara zawn re (sh) yu gawn lajang ai wa kaw nna hprawng mat na matu hkalem lau la ai lam, hprawng ai lam hta n gun jaw garum ai lam, hprawng wa ai Ma re chye nga ninglen hkap la da ai lam, makoi da ai lam (sh) mi na shara de bai nsa lu na matu shingdang da ai lam...

Rai shadun - mortgage

JAN SHINGKANG NPU E

2008-12-03T22:34:00.000-08:00

* Hpa wa lak lai nga ta? Jan shingkang npu e... hpaw wa shai nga ta?
Jan gaw kahtet la nga ai, Nkau mi gaw Jan shingkang hpe shingdang ai makawp npu e, katsi hpa ni hpe lu rai.... Nkau mi, salat she lwi rai,lamu de dawng mada nga ma ai... hpa wa shai nga a ta...

* Nshung saiwan ni hte, katsi la nga ai.. nkau mi lum la ai shingnip kata e, alum ala rai, nkau mi htingku let, pyi gying wa tim kanang ta bu hpun nba? ...

* Hpa wa shai nga a ta?.. Mu dung dung ngoi let, marang kaba htu nga ai. Nkau mi hkun hkun hkraw hkraw re dap hkun makau kaw jahta nga ma, nkau mi madi manyap, lamu marang sha! sha! re kaw myi di chyip.... hpa wa lak lai nga a ta?....

* Maw ! la mu nanhte a matu Jan shingkang, nshung saiwan, lamu marang maren mara rap rap ra ra garan la mu... hpaw wa shai nga a ta? hpa wa lak lai nga a ta?

MAJAN NGU AI GAW

2008-11-18T06:08:00.000-08:00

* Ndai laman Myen hpe bai gap na n gap na nga ai shiga ni lu hti hkrup ai majaw ngai mu mada ai nchye nkaw nga ai kachyi mi hpe ka mara dat nngai law....

* Lama na bai gap na nga yang, Myen hpyen dap hta lak nak grai shagreng kau sai, hpyen n gun mung grai law mahkawng da sai lam chye lu ai. Dai majaw anhte nlaw la ai hpyen hpung ni a matu myit daw hpa gaw rai nga ai. Raitim majan ngu ai gaw myit n gun hte ladat hpaji gaw grau ahkyak ai lam hti sagawn lu ai majaw sawn yu hpa mung rai nga ai.

* Bai Miwa mung, Gala mung kaw mung W.P myu sha ni law law shanu ai re majaw anhte bai gasat wa ai shaloi Miwa mung hte Gala mung asuya ni mung tsang wa na re, shanhte hku nna anhte gasat wa ai shaloi shanhte mungdan a matu mung tsang hpa langai re ngu hkap la wa na re.. Raitim, Myen ni hku nna mung majan hta gyip gyeng ai lam ni byin na re

* KDA wuhpung a Ningbaw kaba Mahtu Naw tsun ai gaw "Mung masa galaw na nga yang hpyen kaw na pru ra ai, sinat laknak hpai na nga yang mung masa nmai galaw ai" nga ai.

* Gara hku mi rai rai " Majan ngu ai gaw, awng dang ai ni a matu n gun grau ja wa, sut grau su wa nna, majan sum ai ni a matu myit daw hpa, n gun yawm let matsan mayan rai na" ngu mu mada let.. Angawk angak di mu mada dat nngai...

MYENMUNG JINGHPAW WUNPAWNG DAKKASU JAWNG MA NI HTE HKRUM AI LAM

2008-11-18T05:34:00.000-08:00

* Lai wa sai 10-13.11.2008 laman Myenmung Jinghpaw Wunpawng Laili Laika hte htunghking hpung (Dakkasu jawngma ni)a Myenmung Dan kata, Dakkasu shagu na JLH mu gun ni hkrum zup bawng ban ai lam hpe lahta sam mung, lashio mare hta galaw lai wa sai.
N dai lamang hta Jinghpaw Wunpawng Jawngma ni lung nga ai Dakkasu ni hta na Yangone hte Mungywa kaw na JLH ni sha nlu du mat ai hku re..

* Dakkasu jawng ma ni hku nna myu sha lam yan ni hta grai myit rawt ai hpe mu lu nngai. Grai mu kabu n gun lu sai. Ngai mung shanhte hte hkrum shaga lu nngai. Nkau mi mung masa lam hta grai myit rawt ma ai.

* 13.11.2008 hta lahta sammung KDA ginjaw Kawnghka de lung nna KDA ningbaw kaba Mahtu Naw hte hkrum jahta ai lam ni galaw lai wa sai. KDA wuhpung kaw na gara hku lam woi sa wa ai lam, gara hku yaw shada ai lam ni hpe san htai lamang ni galaw lai wa sai.

* Myenmung dan Dakkasu ni hta lung nga ai Jinghpaw Wunpawng jawng ma shagu gaw anhte a myu sha ni hta kaning re wuhpung wuhpawng ni nga ai, gara wuhpung gaw gara hku re ai lam ni hpe chye ra ai hku re. Dakkasu jawngma langai mi galaw taw nna, tinang a Jinghpaw Wunpawng Dakkasu jawngma wuhpung (J.L.H) hpe sha pi nchye rai yang gaw nmai nga ai. Hkrak ai rai tim nhkrak ai raitim, Kaja ai raitim nkaja ai raitim dai wuhpung a lam gaw chye ra nga ai.

* Kaja nga yang gaw W.P myu sha langai rai sai kaw na gaw tinang myu sha ni hta kaning re wuhpung ni nga ai lam hpe hkumdek shagu chye ra na re.. kaja ai n kaja ai gaw ahkyak nre, dai wuhpung ni a lam gaw anhte chye nan chye ra ai ngu mu mada let ....

( Mung masa hpe hka ja nna, myu masa lam hpe madung galaw ga ngu ) NAWDUT

MYU SHA NI A DUM NTA

2008-11-11T05:12:00.000-08:00

* Marit maroi rai na wang chyinghka hta,
yawn myiman hte Wa gaw la taw nga..
ma ni rai ndu hkum ai nga Nu shaga,
nta masha ni lau wa marit nga..

* Zim e zam e rai na wang kata hta,
myi prwi hkrat let Wa gaw mau dung nga
Nu sha ni e lau she bai wa marit nga..
myi prwi si hte garen aput nga..

* Kaning rai nta hta chyai, tsun htai lai ai,
mang hkang shatai, shinggan de bra hkawm mat mani?
Hpaw majaw shada ntsaw, myit mang nchyaw,
gali galaw, dum bru dum bra rai nga mani?

* Hpa rai nna myit nrum ma ta,
ya anhte a masin dum nta kata,
Nu yan Wa hkrai yawn garen let la nga,
annau ni yawng bai hkrum u nga

* Hpan Karai Wa jaw ya ndai ginra,
Ji wa ni salum noi nga ai nta
shada nru nra rai na nmai nga..
ndai ginra tut makawp nga ra...

( Anhte Chyurum Wunpawng Myu sha ni kaw byin taw nga ai hpe htawng madun dat law )

MA HKUM JAHTEN AI, MA GABAI KAU AI RUHKA AMU NI

2008-10-31T05:50:00.001-07:00

Section; 312 - "a, b, c, d," 313, 314, 315, 316, 317, 318 yawng section (11) hta na, nkau mi...

Section 312; Kadai raitim, ma hkum hte re num a asak hpe hkye na matu myit ai hku nre sha, ma hkum hte re num hpe ma hkum hten na matu, tinang nan galaw ai rai yang, dai wa hpe masum ning du hkra re bawng dam lama ma mi rai, gumhpraw dam mi rai, dam lahkawng yan mi rai jahkrat ra na. Num gaw shamu shamawt nga sai ma hkum hte rai yang, dai wa hpe sanit ning du hkra bawng dam lama ma jahkrat ra na hta n ga, gumhpraw dam mung jahkrat lu ai.

Shaleng ai lam; Tinang a ma hkum hpe tinang hten shangun ai num mi raitim, ndai section hte hkra ai.

Section 315; Kadai raitim, ma rai n shangai shi yang, dai ma asak hkrung let shangai wa na hpe shingdang na myit nna mi rai, shangai ngut ai hpang si na matu myit nna mi rai lama ma hku galaw let, dai zawn galaw ai lam hte dai ma asak hkrung let shangai na hpe shingdang yang (sh) shangai ai hpang si shangun ai rai yang, shingrai galaw ai lam gaw kanu a asak hpe hkye na matu myit nna galaw ai nrai yang, dai wa hpe shi ning du hkra bawng dam lama ma mi rai, gumhpraw dam mi rai, dam lahkawng yan mi rai jahkrat ra na.

Section 317; Asak 12 ning a lawu na ma a kawa (sh) kanu mi raitim, rem hkang ai wa mi raitim, dai ma hpe tsepkawp gabai kau na sawn let, gara shara hta mi rai gabai da yang, dai wa hpe sanit ning du hkra bawng dam lama ma mi rai, gumhpraw dam mi rai, dam lahkawng yan mi rai jahkrat ra na.

Shaleng ai lam ; Gabai da ai majaw dai ma si mat ai rai yang, dai tawt lai ai wa hpe amu hta hkan nna, masha sat ai amu hte mi rai, ari jaw ging ai masha si amu hte mi rai, jep jeyang ai hpe shingdang na, ndai bukma (section) yaw shada ai lam nrai.

Section 318 ; Rai n shangai ai mi rai, shangai ai hpang mi rai, shangai nga ai ten mi rai, ma si mat nna, dai ma a moi mang hpe lagyim lup kau ai lam hte mung, kaga ladat hte lajang nna mung, ma shangai ai lam hpe da sang shangam ai rai yang (sh) shangam na matu shakut yang mung dai wa hpe lahkawng ning du hkra bawng dam lama ma mi rai, gumhpraw dam mi rai, dam lahkawng yan mi rai jahkrat ra na.

* Ma hkum jahten ai lam - miscarriage

* Shamu sai ma hkum hte re num - The woman be quick with child.

* rem hkang ai wa - The care of sush child

* masha sat amu - murder

* ari jaw ging ai masha si amu - culpable homicide

HKRUP MARA TSUN NNGAI...

2008-10-29T06:42:00.000-07:00

Hkau e .....
anhte a daw dap za ru za ra rai,
wan shinglet gaw grau grau kang gahtet wa,
nhtung kaw hkring mi naw
dung yu na nngai yaw....

Gai taw......
Hkau ni tsun yu mu,
kaning rai byin mayu ai law...
rai sa, shing ngu ga taw.

Umm... Umm...
nhtung kaw grai kang gahtet la ai,
hkau e,.. nang bai dung yu u,
rai sa, ngai hkrup mara tsun na sai

Dung u, dung mu, gai ... gai .. gai..
kadai tim dung mu,
ngai tsun sai, wan hkut hku ai,
nga yang me...

Naw jahta nga mu yaw,
ngai ntawt de she gan yen sai...
rai sa, ngai hkrup mara tsun nngai...

Yu... law, nhtung kaw hkum shachyat dung,
ngu yang me ....
e le... daw dap grai gyip nga ai...

Umm le....
wan hkut hku ai,
wan grai kang ai,
daw dap gaw za ru za ra,
rai sa, ngai hkrup mara tsun nngai...

GWI WAU NSEN A HPANG NA YAWN HKYEN POI

2008-10-25T00:03:00.000-07:00

# Loi gaw na sai,... Lahta sammung na Jinghpaw gahtawng mare langai a shana de, ningsin rim rim re ten, yi sun, hkauna sa ai ni mung bai wa masai, nga tam sa ai ni mung bai wa masai. Shara ra hta hpawmi 2, 3 htingga, shingnoi gun let jahta nga.... shara ra hta brang ram, mahkawn sha ni hka nhtung hpai let wang chyinghka kaw jahta,... dai zawn re ten .........
# Shanhte tsun nga ma ai, " Mare baw de gwi grai wau ai" da. Gwi wau nsen na na yang mare masha ni a masin salum " dik.. dik.. dik .. dik.." nga shamawt lawan wa ai gaw ya sha nrai, galoi mung, gwi wau nsen na shagu...
Mare masha ni chye ma ai, kade nna yang hpyen hpung langai ngai mare ka-ang lam ding yang yen hkawm wa na hpe...
Dai majaw kadai mung kade nta wa nna, nta kata kaw myitru myit tsang, hkrit myit ni hte zim sha mau dung nga na hpe, mare masha shada da chye nga chyalu.....
# Rai sa... kade nna yang atsit tsit rai, kyepdin nsen mare ting gara rai, du wa masai. Dai zawn kade nna yang.... " PUNG... PUNG... PUNG" sinat nsen ni ngoi pru wa sai. Dai hpang, dai hpyen hpung ni mare shinggan de yen pru mat wa sai .,..,..,./
Gahtawng mare chyawm gaw, hkrap nsen hte garu kachyi nga ngam da sai.. Nkau mi yawn hkyen poi galaw na matu hkyen... nkau mi myi prwi si hkrat rai mau dung... kade yawn tim, mau gaw nmau nhten,........... Dai zawn hpyen hpung lai wa shagu, ndai zawn byin nga dingyang.....

" Shang wa marit! sinat laknak hpai ai hpyen hpung ni e.. ! .. Anhte a gahtawng mare de nanhte shang wa yang, gwi woi nsen na ngut ai hpang, marai langai ngai (sh) marai 2, 3 a asak jaw ra na re hpe chye nga ga ai.... Nanhte lai mat wa nna, kaga hpyen hpung mi bai du wa ai shaloi mung, gwi wau ai nsen na ngut ai hpang, mi na zawn sha byin na hpe mung tau chye nga ga ai ..."

SHATA JAN HPE LAGU MARAWP AI NI

2008-10-23T07:54:00.000-07:00

* Shata jan mai shagu ngai hkawm ai,
ngai lam hkawm chyai ai...

* Dai shayi sha langai mi,
Ja kabrim ai, tsaw kahtap ai nta a
hku wawt kaw na mada yu yu re..
ngai mung dai de dawng mada yu yu re..

* Lana mi, lahkawng na, masum na.......
dai zawn, dai zawn...

* "Nang grai tsawm htap, hkik hkam ai,
nang shata jan hte bung ndai" ngu
ngai marawn tsun ai....
shi mung bai marawn tsun ai,
" Nang grai simsa ndai, grai ngwi pyaw ndai,
shata jan mai shagu hkawm chyai lu ndai" da..

* Dai shana lamu ntsa
shata jan kaw nna, yu ngwi pru ai,
nanhkawng yan ngai hpe lagu marawp myit dai....

NAM CHYIM DWI DWI YUP MANG

2008-10-17T01:29:00.000-07:00

* Shata jan npu, hka hkin gau hta tingse sumpyi madum sum hpa, nye yungwi hpe hka ntsa e lai wa ai bungshi ni pyi shagrau da ma ai...
* Ngai hkawm ai lahkam shagu yet sha, nampu nampan ni nep rai... Ri dunghkum a shawng na sha ku hta tsabyi ntsin (wine) hte nam si hkum sumhpa, dwi sau mu dik hpan malu masha hte hpring...
* Nye a pai lata hta tsawm htum shayi dun, nye lahpa hta shi a manen hawm ai kara hpe mara, si mani ai sumsai hte ngai hpe dawng yu nga... ngai angwi ngwi sit let, hpat wat ntsa sit let....
* Hku wawt kaw na yu dat yang, yu dat yang.. nsam hkum tsawm ai grup yin, sa ra, nampan sun, manap jau na "jan" kasa pyi du sai... wang shinggan du ai hte atsit ahkyeng re nsam, nhtu n ga, soi nhpye hpye, tu kabrim ai, she she pyi gara,
* Dai hpang hpang hpang.... du sat du myeng sumla ni shakap da hpun pye galu gadun ni hpe, shangwang let aw ra ra.. aw ra ra... shamu shamawt rai masha ni, masha ni... hpat wat ntsa ngai angwi ngwi sha sit lung, sit let..
* summwi ni bum ni a ntsa pyi du sai, lawu de mada dat yang mi na zawn, jut shagu dai zawn... ngai angwi ngwi sha sit let sit let..
* Ngai myi rai nhpaw u ga, rai nhprang u ga, "U" rai hkum goi, ngai dum mat na ra ai... nye myi man hpam nga... "Jan" lagaw, kapang mi htawng hkra sahka..
ngai angwi ngwi sha.... sit let ... sit let ... sit let.....

(sumroi kadun chyim yu ga) Nawdut

Ja Chyum Ga

2008-10-14T09:59:00.000-07:00

Yehowa ndawng nga ai lam kru rai nga ai. Rai sa shi matsat kau ai lam sanit gaw,

Gumrawng gumtawng re ai myiman,
masu ga tsun ai shinglet,
mara nkap ai wa a sai hpe jahkaw kau ai lata;
N kaja ai hpaji daw ai myit masin,
kajam galam galaw na lawan ai lagaw,
Masu ga tsun ai sak se wa,
kahpu kanau shada dumbru dumbra shangun ai wa rai nga ai.

( Ga shagawp 6; 16 - 19 )

NAWKU HTUNG SASANA LAM THE SENG AI RUHKA AMU NI

2008-10-14T09:52:00.000-07:00

Section 259(a) ; Mung hpawm Myen mung dan hta shanu nga ai masha hpan langai mi a nawku htung, makam masham myit hpe myit machyi na matu da sang nshawp ai myit hte kadai raitim ga the mi rai, lai ka hte mi rai, dan leng ai hkrang kumla hte mi rai, dai masha hpan ni nawku ai makam masham sasana lam hpe raitimung, nawku htung sasana makam masham hpe raitimung roi ai rai yang (sh) roi na matu shakut shaja yang, dai wa hpe 2 ning du hkra bawng dam lama ma mi rai, gumhpraw dam mi rai, dam lahkawng mi rai jahkrat ra na.

Section 296; Upadi the maren nawku htung sasana lam the seng ai nawku ku ai lam galaw nga yang (sh) nawku htung sasana lam hte seng ai zuphpawng ai lam galaw nga ai hpawng shingra langai ngai hpe kadai raitim tinang myit hte tinang dingbai dingna byin shangun yang mung, dai wa hpe 1 ning du hkra bawng dung dam lama ma mi rai, gumhpraw dam mi rai, dam lahkawng yan mi rai jahkrat ra na.

Section 297; Marai langai ngai a myit hpe machyi na matu sawn nna raitim, marai langai ngai nawku ai nawku htung sasana lam hpe roi na matu sawn nna raitim, marai langai ngai a myit hpe machyi shangun na re hpe (sh) marai langai ngai a nawku ai nawku htung sasana lam hpe roi ai lam re hpe chye nga ninglen mi rai, kadai raitim, nawku zuphpawng nga ai shingra hta mung, lupwa hta mung, makoi mayang zuphpawng galaw na matu lak san tawn ai shara hta mung, sa tawt lai roi yang (sh) moi mang hpe nshawp nkap galaw yang (sh) makoi mayang hpawng galaw na matu, zuphpawng nga ai ni hpe dingbai dingna byin shangun yang dai wa hpe 1 ning du hkra bawng dam lama ma mi rai, gum hpraw dam mi rai, dam lahkawng yan mi rai jahkrat ra na.

Section 298; Marai langai ngai a nawku htung myit masin hpe machyi na matu da sang sawn nna, kadai raitim dai wa na lu ai shara hta ga tsun yang (sh) nsen lama ma shapraw yang (sh) dai wa mu lu ai shara kaw lai kumla lama ma galaw dan yang (sh) arung arai lama ma hpe madun da yang dai wa hpe 1 ning du hkra bawng dam lama ma mi rai, gumhpraw dam mi rai, dam lahkawng yan mi rai jahkrat ra na.

NAWDUT "GA MALAI" NNAN SAWN SHAPRAW DAT SAI..

2008-10-12T23:19:00.000-07:00

* Nau sawn yang baw hpraw , nau tsun yang bawlaw.

* Tsun yang gaw manang, bai dun jang manghkang.

"Ga Malai" ni hpe hti yu, hta la na lam hpe sawn sumru..
Tsun mayu ai lam nga na hpe mung kam, c'box hta na a lata hkrang,
Tsun pru wa na na nsen, Nawdut hpe tut shareng.....

MUNGDU WA DU SAI

2008-10-12T23:00:00.000-07:00

Mung tsaw myu tsaw du salang,
( Sumbu kaw hta bang )

Du salang wa du sai nga,
shawa yawng zim ya..

Htet sha na ra ai ni hpe
aja awa htet sha na,
( Ngam ai mahkra magawn gun la )

Ngai kam ai ni hpe, ngai tsun
jaw ai shut ai hkum dinglun..

dinglun ai wa, hkam la ra,
(Magri) lahkawn kumhpa lu na..

Rawt mu sa mu, rana ni,
(ngai myit lit nli)

Yak ai hkak ai ngai hte nseng
( Kadai mung n gwi shagyeng...)

Ngai tsun ai hku galaw mu
( nye nga mu lam n hkanu )

NANG HPAM TSI MAWAN HTE MYIT HPE GALAI SHAI KAU SHANGUN YA AI TSI MAWAN NI HTE SENG AI UPADI (SECTION 26 )

2008-10-05T07:00:00.000-07:00

Section 26; Kadai raitim lawu na nanghpam tsi mawan (sh) myit hpe galai shai kau shangun ya lu ai tsi mawan hpe dai hte rau madun da ai numnak, bap (sh) hti hkum raitim, dai masat da ai hta jan nna mung madu da ai rai yang dut na matu madu da ai ngu nna mung, gun htaw shalai ai lam, htawt sa ai lam, htawt shalai ai lam rai yang dut na matu gun htaw shalai ai lam, htawt sa ai lam, htawt shalai ai lam re ngu matsing la ra na.

(a) Ka ni hpraw (heroin) - (grammes 3)
(b) Morphin rai yang - (grammes 3)
(c) Mono-acetyl mophine rai yang - (grammes 3)
(d) Bukma daw shan (a),(b)hte (c) hta lawm ai nanghpam tsi mawan yawng pawng gaw grammes 3 (sh) dai hta na hpan lahkawng pawng gaw grammes 3
(e) Ka ni katsing (sh) gram lajang da ai Ka ni (sh) dai hpan lahkawng pawng yang gaw grammes 100
(f) Lachit (sh) lachyit sau (sh) dai hpan lahkawng pawng yang grammes 25
(g) Koka lap rai yang grammes 100
(h) Kokin rai yang grammes 3
(i) Hkam kaja lam hkring mang dap kaw nna, nang hpam tsi mawan (sh) myit hpe galai shai kau shangun ya ai tsi mawan a matu aten ladaw hta hkan nna aming ndau shabra laika shapraw nna masat da ai num nak, bap (sh) hti hkum

(Lahta na nanghpam/myit galai tsi mawan grammes (sh) dai hta grau ai grammes hpe lu rim ai rai yang, " nanghpam / myit galai bukma 19(a) hte hkra nna, dai hta shau ai rai yang,"nanghpam/myit galai bukma 16(c) hte hkra ai.)

lachyit hpun - ေဆးေျခာက္ပင္
bap - ပမာဏ
num nak - အေလးခ်ိန္
hti hkum - အေ၇အတြက္
grammes - ဂ၇မ္

Matut shakut ding yang ngai Nawdut

MAKAM MASHAM LAM SASANA LAM HTE SENG AI RUHKA AMU NI (Of Offences Relating To Religion )

2008-10-05T06:08:00.000-07:00

Section 295; Masha hpan mi nawku ai kam sham lam, sasana lam hpe roi na matu sawn let raitim, nawku ai htingnu shara hpe mung, chyoipra ai hku tawn ai arung arai hpe mung jahten shaza ai rai yang (sh) hten za hkra machyi shangun ai lam gaw (sh) awu asin byin shangun ai lam gaw, dai kam sham lam sasana lam hpe roi ai ngu dai masha hpan ni hkam la ai hpe chye nga ninglen mung kadai raitim, dai masha hpan mi a kam sham lam sasana lam hte seng ai nawku dawjau lam galaw ai shara hpe raitim, chyoipra ai hku tawn ai arung arai hpe raitim jahten yang (sh) htenza hkra machyi shangun yang (sh) awu asin byin shangun yang dai wa hpe 2 ning bawng dung dam lama ma mi rai, gumhpraw dam mi rai, dam 2 yan mi rai jahkrat ra na.

(Makam masham hte seng ai, MYANMAR THE PENAL CODE hta section 5 rawng ai, ngam ai section 295(a),296, 297, 298 ni hpe mung ga gale nga ding yang rai nga ai. matut mara mat wa na re..

INTERNET PANGLAI

2008-10-03T23:24:00.000-07:00

* Ngai hpung yawt nga dingyang
kalang lang gaw hka marit,
kading kadang nga mung hkam sha yu sai.

* Ngai hpung yawt nga ding yang
" gung " rawng ai nga kasha ni hpe
sha hkrup na mung tsang ra,
lawt lam nnga numru ni hkan
abai mahkai mat na gaw hkrit ra.

* Ngai hpung yawt nga nngai,
kalang lang hka leng ni hte mung,
yawng lawm mat wa..
lung rawk hpe mung adawt hkra yu sai.

* Hka sang hpaw, hka li
kaji kaba law law,
nkau mi gaw ning kaw jawn rit da,
nkau mi hpe gaw ndep kau...

* Tsim yu, wo yu, hpung yawt yu,
yawng lawm yu...
Nawdut e.... naw hpung yawt u,
naw tsim u, matut yawng nang,
naw wo u... Nawdut e...

Nawdut

NUM DUT MARI AI RUHKA AMU ( SHALAI SHA AI BUKMA )

2008-10-03T23:08:00.000-07:00

Section 366; Num wa gaw myit nhkrum ai sha, dai num hpe marai langai ngai hte hkungran, jaw sha na matu atik anang galaw na myit nna mung, dai zawn atik anang shagyeng hkrum na hpe chye nga ninglen hte mung, shagyeng dip sha ai hte mung, " ngang" kanawn na hkalem la nna kyang lailen jahten ai hte mung, ntara ai "ngang" kanawn roi rip na matu mung, shingrai shagyeng dip sha galaw ai lam (sh) "ngang" kanawn na hkalem la kyang lailen hten za hkrum na hpe chye nga ninglen mung,
Kadai raitim num langai hpe lagu la yang (sh) hkalem lau la, woi la ai rai yang dai wa hpe 10 ning du hkra bawng dung dam lama ma jahkrat ra na hta n ga, gum hpraw dam mung jahkrat lu na.

(Myen mung kata na num ni hpe miwa mung de dut sha, shalai sha ai lam ni ndai section hta hkra ai. )

atik anang shagyeng ai - kidnaps
" ngang " - sex

( MYANMAR THE PENAL CODE kaw na bukma 366 hpe ga gale da ai re.)

U GOI SAI

2008-10-03T09:12:00.000-07:00

* ( Ma Gam, Ma Naw U goi sai..
lawan rawt manu,
hka ja sa manu,
nga rem sa ten du sai...)

* Hka nhtung hpai let,
W.P shayi ni rawt masai
nga dun let brang zet ni,
hkawm wa sai..

* Ma nkau mi mare baw kaw,
gin sup na matu du nga masai e..

* Shana de ningsin rim rim nga yang,
nga ni gali ai ding si gaw mare baw lam,
ding yan ngoi nga ai,
hka nhtung hpai na shayi sha ni,
dum dum hte hte nga shaga let,
mare ka ang hka singgat de sa wa nga ma ai..

* shana..
shata jan npu kaw ma ni ginsup,
mahkawn shabrang ni mahkawn hte rung nga,
dinggai ding la ni nta ntawt kaw kamung jahta...

* oh... ngai grai marit ai shagawng bum ga...

NAWDUT
( Sawn dum ai shagawng bum mare na )

N gun la ga

2008-10-01T07:32:00.000-07:00

Ngai tsawra ai wa gaw, shi a sun hta namsi sha nna, hka law pan di la na nga... shi a sun hte, manam pyaw ai nampan lawk de, yu wa sai. (Shawlumon ; 6:2 )

2008-10-01T07:18:00.000-07:00

Bai, nanhte hpe ngai tsun made ga, nanhte hta na marai lahkawng, dinghta ga e myit hkrum da ai hte hpa lam hpe mung hpyi mu yang gaw, sumsing lamu e nga ai nye wa gaw, shan a matu dai hpe shatup ya na mu ai. Kaning rai nme law, marai lahkawng masum, nye a mying hpe gang nna zuphpawng nga ma yang gaw, dai yang shanhte a ka-ang e ngai mung lawm nga nngai, ngu mu ai (Mahte 18:19-20)

Myen mung dan na nang hpam tsi mawan hte myit hpe galai shai kau shangun ya ai tsi mawan Upadi nkau mi (narcortice law)

2008-10-01T06:25:00.001-07:00

Section 15; "Nanghpam lu sha ai wa" gaw hkam kaja lam hkringmang dap kaw nna masat da ai dap (sh) ndai lam a matu Asuya kaw nna, matsing masat da ai tsi lajang ginra hta jahpan nbang ai rai yang mung, tsi lajang hkam na matu hkam kaja lam hkringmang dap kaw na ndau shapraw da ai matsun maroi ni hpe nhkan sa ai rai yang mung, bawng dung dam nlaw htum 3 ning kaw nna, law dik hteum 5 ning du hkra jahkrat ai hkrum ra na.

Section 16; Kadai raitim lawu na shut hpyit lam langai ngai hpe tawt lai ai lam, ruhka amu danleng je yang hkrum ai rai yang dai wa hpe bawng dung dam nlaw htum 5 ning kaw nna, law dik htum 10 ning du hkra jahkrat ra na hta n ga, gumhpraw dam mung jahkrat lu ai.
(a) Kani hpun, koka hpun, lachyit hpun hte hkam kaja lam hkring mang dap kaw nna aming ndau shabra laika shapraw let nanghpam tsi mawan re ngu ndau da ai hpun lama ma hpe hkai ai lam,
(b) Seng ang ai hkring mang dap kaw nna aming ndau shabra laika shapraw let nang hpam tsi mawan (sh) myit hpe galai shai kau shangun ya ai tsi mawan hpe galaw shapraw ai hta lang ai arung arai re ngu ndau da ai arung arai ni, dat jasat arung arai ni hpe ndai Upadi(law) hte maren ahkang lu ai lam nnga ai sha, madu da ai lam, gun htaw shalai ai lam, shabra ai lam, dut ai lam.
(c) Nang hpam tsi mawan (sh) myit hpe galai shai kau shangun ya ai tsi mawan hpe madu da ai lam, gun htaw shalai ai lam, htawt sa ai lam, htawt shalai ai lam,
(d) Nang hpam tsi mawan (sh) myit hpe galai shai kau shangun ya ai tsi mawan hpe Upadi hte maren ahkaw ahkang hte madu da ai wa gaw ahkaw ahkang nlu ai wa hpe htawt shalai ai lam,
(e) Nang hpam tsi mawan (sh) myit hpe galai shai kau shangun ya ai tsi mawan hpe kam mara jai lang lu sha na matu shadut ai lam, lau la ai lam, hkalem ai lam, shagyeng shama ai lam, nhtap htuk ai shingkang shingna lang ai lam (sh) kaga lam lama ma hte galaw ai lam,
(f) Ndai Upadi hte zing da ai (sh) waran shakap da ai arung arai hpe kam mara jai lang ai lam, shamye shamat ai lam, jahten ai lam, htawt sit ai lam, htawt shalai ai lam,

Section 19; Kadai raitim, lawu na shut hpyit tawt lai ai lam langai ngai hpe galaw nna ruhka amu dan leng je yang hkrum ai rai yang, dai wa hpe bawng dung dam nlaw htum 10 ning kaw nna law dik shaning ladaw masat lam nnga du hkra jahkrat ra na.
(a) Nang hpam tsi mawan (sh) myit hpe galai shai kau shangun ya ai tsi mawan hpe dut na matu madu da ai lam, gun htaw shalai ai lam, htawt sa ai lam, htawt shalai ai lam,

Section 21; Kadai raitim ndai Upadi hta lawm ai ruhka amu langai ngai hpe tawt lai na matu shakut shaja ai lam, ginrun ladat shaw ai lam, ja gumhpraw madi shadaw ai lam galaw yang mung, ruhka amu langai ngai tawt lai ai shaloi n gun jaw, garum shingtau ai lam galaw yang, dai tawt lai ai a matu ndai Upadi hta masat da ai ruhka dam jahkrat ai lam hkrum ra na.

(Myen mungdan a 1993 ning nang hpam tsi mawan hte myit hpe galai shai kau shangun ya ai tsi mawan Upadi kaw na ga gale da ai re.. )
Byin law, lang law ai hpe sha naw shawng mara ai re, matut na naw mara na nngai..

Nawdut

MAKAU GRUP YIN NGU AI GAW....

2008-09-30T09:21:00.000-07:00

* Mungkan ga gaw ningma hte, ana zinli hte machyi taw nga sai.. shi hpe mai hkra tsi na nmai byin mat sai.. ndai hta grau n machyi hkra shingdang da na matu sha mai mat sai..

Gara hku shingdang na .... ** Anhte lang ai arung arai, buhpun sumli ai, lang ai arung arai ni hpe sharam lang ai lam gaw anhte lu galaw nna mai byin ai ladat langai re. Hpa majaw nga yang, dai zawn sharam lang ai a majaw, dai arung arai ni hpe shapraw ai jak rung ni kaw nna nhprang sut rai ni hpe sharam shaw wa na, hpun kawa ni lang ai shau wa na, du hkra ladaw ni hkrak wa na re ngu saw shaga dat nngai...

# Nga yawng nga pra hpe chye tsaw ra nna, kaja ai mabyin hpe byin shangun ai ni tai ga ngu....

Nawdut

( sharin la sawk la re kaw na nkau mi...)
Makau grup yin hkangzing hpung kaw na gaw nrai nngai...

Blog a lam

2008-09-25T08:03:00.000-07:00

Nang Ngai Yawng GaLaw Gin Ai

Rsj

Blog A Lam

Blog Hte seng na n chye lu shi ai manang ni n kau mi hpe wp blogger ni loi law wa na matu nbwiwa ka da ai hku...yu sa ai..yu sa wa ra ai..kaw na hpang ya dat sai hku re chye ai ni gaw ngai sharin ai shut n shut bai "Ga Masat" ka kau da ya myit..
N dai lamang ahhte buga lasho,sammung na manaw manang ni mung blog myit lawm ai lam ni galaw mayu ai lam ni loi tsung jahta wa ai re majaw gaw lu malu ten ni hpe n chye n kaw, n hpring n zup rai tim, Dai ni kaw na, Wp blogger ni mung, Mati, Kamu tu ai zawng law htam wa let, lam ahmyu myu hpe garan gachyang hkat le "online" Gamung Jahta ai kaw na................................"online" kaw na "Num-Woi...Num Ya" ai kaw du hkra :) Prat dep masan sa.....wa lu na hpe jut shara mi kaw na...lakang lagam mi sha byi tai lu u ga ngu.....
" Shanghtin " wa Ka Madung ai Blog hpang sai.....n re sha....Blog ...Shawng De....Ngu...Ga Baw dat le...Lani mi Ning-gam mi rai na ....Hkum Zum Ai N ta n nang lu ra ra ....rai du hkra lam madun wa na re hpe N chye ai ni kabu lu hkra...Chye ai ni..Mung Hpa ji jaw rai na hpe kam let...Yaw sai hku re...Washat ...:)...( washat yaw mayu tim n dai kaw wa n mai rem na yak ai law) Du sat rem mayu jang Tax nau jaw ra na, Madu Kan sha Rem taw sai hku re ...Ya hkyak hkyak gaw... :)

shawng ning nang .....hku na..madu lang ai computer ... Miwa laika wa rai rai..gala laika wa rai rai... google kaw na hpang la jang ahloi sha re....

www.google.com

N dai hku rai sai i nga jang gaw madu blog hpaw na re majaw gaw....

http://draft.blogger.com/home
ngu na google kaw tam dat ga.....!
n dai zawng pru wa na re hpe mu na re....

Loi shut taw na kung atsawm yu la ga..

N dai kaw ra ai ni hpe yu na lajang la mai sai..:)
Ngut jang n ta hkrang la ta la mai sai..
N dai gaw ngut jang

Dai kaw gaw mai chyam yu sai...

http://www.theproxypalace.com/index.php?q=aHR0cDovL3d3dy5zaGFuZ2h0aW4uY28uY2M%3D
kaw na hkau Hkau Shanghtin wa a blog kaw na copy da ai re...
( Blog a lam ka mara da ai hkau Shanghtin hpe grai chyeju dum ai hku re)

SAI KATA NA VIRUS

2008-09-22T04:49:00.001-07:00

Grai ba ai lo...
makau na manang ni,
shanhte tsun ai hte,
ngai myit ai hpaw nseng,

Ngai a jinghku ni hte,
tsun ai lam kaga ga..
hpaw ni wa byin taw ai kun?
ngai sharai yu sai...

Grai yak ai lo...
sai kata na hpunau ni hte,
shai taw sai law...
hpaw wa byin a ta?

Ngai hkrai ngai pi nchye ai,
nye hkum hkrang, nye bawnu ni,
nhtang hku gayin wa sai...

Grai mau ai lo...
ngai tsun ai gasi ni,
ngai hkawm ai lahkam ni,
ngai myit mang ai ni,
ngai pi nlu hkap la ai lo...

MYIT MAKYIT SUMRI

2008-08-26T07:52:00.000-07:00

@ Htaw shagawng bum ntsa na, lama mi gaw tsun nga ma ai,
nchye nchyang kaji kadun, yak hkak hkrum ai lam ni law rai...
@ Anhte a daw shan ni rai, lama mi gaw sawn yu ra sai,
bai gayin let mada dat rai, pawn ba ra ai lam ni law rai...

### Dai ni chyam bra nga sai hpu nau ni e..
mungkan jut shagu na myu sha ni e...

@ Tsan tsan de mada yu, mungkan ting hpe chyan yu raitim,
anhte a lagaw, ngang ngang tsap, anhte a hkum hkrang,
myit makyit sumri, ndaw nhka rai nga ga i..

@ Htaw jiwoi ji wa ni a tsun ai ga hpe bai madat yu,
ta gindun let makyit mahkai, shada pawn ba lam woi ga i.....

kyu hpyi ga...

2008-06-02T02:51:00.002-07:00

MYEN MUNG DAN SHAGU NA CYCLONE LARU HKRUM AI NI HPANG DE, KANING DI GARUM NA NCHYE, NDANG DI LU GA AI RAITIM........

- SHANHTE NI MYIT KAJI GAREN HKRUM AI HPE SHALAN SHABRAN YA RIT LAW.

- JA GUMHPRAW HTE, LU SHA HTE, ARUNG ARAI NI HTE GARUM AI NI YAWNG A NTSA E MUNG GRAU NNA LAW HTAM AI SHAMAN CHYEJU JAW YA RIT LAW.

- TINANG A KUN DINGHKU NTA MASHA SHAMAT KAU NNA YAWN GAREN HKRAP JAHTAU NGA AI NI YAWNG A NTSA E MUNG SHALAN SHABRAN AI SHAMAN CHYEJU JAW YA RIT.

- MATUT NNA SI HKRUNG SI HTAN AI NHKRUM U GA MUNG BAU SIN MAKAWP MAGA YA RIT.

- UP HKANG NGA AI ASUYA NI A MYIT MASIN HPE MUNG MATSAN CHYE DUM AI GARUM MADI SHINGDAW CHYE AI NYEN HPAJI JAW BANG YA RIT.

- HKA HPYEN, LARU HPYEN HKRUM NNA RU YAK NGA AI NI YAWNG HPE LAWAN AI HKU HKYE HKRANG LA NNA MYIT SIMSA AI HKU BAI LU GAW DE LA NA SHAMAN CHYEJU NI JAW RIT.. DAI LAM NI HPE WOI AWN NGA AI GARUM NGA AI NI YAWNG A NTSA E MUNG BAU SIN MAKAWP MAGA NGA YA RIT....

- ANHTE HPE RU YAK AI KAW NA HKYE HKRANG LA AI YESU A MYING NING SANG HTA KYU HPYI N GUN LA GA AI LAW............... AMEN

WASANA (hobby) & KAN BAU BUNGLI

2008-06-02T02:51:00.000-07:00

* Awng dang ai sak hkrung lam ngu ai gaw, tinang a wasana (hobby) hte tinang galaw nga ai magam bungli langai sha rai taw ai lam re. Tinang a magam bungli gaw tinang myit nlawm tim galaw ra ai (sh) ja gumhpraw a majaw galaw ra ai rai yang anhte langai hkrai a myit lawm ai lam hpe kaning re kaw lang na..

* Masha langai mi hta wasana langai gaw lawm ai hkrai rai nga ai. dai hpe kan bau bungli hku akyu jashawn lu yang she masha byin ai lam lachyum pru na rai nga ai.

* Kanbau bungli hte wasana langai sha wa byin na matu gaw , nkau mi gaw grai shakut la ra ai, nkau mi gaw shi hkrai shi htap htuk manu taw ai lam ni rai nga ai....

* Myen mung dan masha law malawng gaw ja gumhpraw lu ai magam bungli hpe tam ra ai a marang e wasana (hobby) hpe makau magap ,gabai tawn kau ra ai..

* Wasana(hobby) lawm ai hpe hpaji hku hkaja nna kanbau bungli hku lu galaw na matu gaw, asak naw kaji ai kaw nna, dum nta kanu kawa ni hte jawng sara ni hta madung nga ai lam sawk lu ai.

* Masha langai hte langai myit lawm ai lam nbung hkat ai hpe gahkyin nna jawm shakut yang she awngdang ai masha wu hpung byin wa na re.
* Masha gaw tinang myitlawm, myit shangsha ai hpe galaw yang grau nna awng dang lawan ai lam mu lu ai.....

* Masha tai ai lachyum pru na matu gaw tinang a wasana hte kanbau bungli gaw langai sha byin tai lu hkra shakut ra nga ai.......

GUMHPRAW LU NA MATU MU GALAW AI NRE, MU GALAW NA MATU SHE GUMHPRAW TAM NNGAI.
myit lu ai hku ka da ai re......... Naw Dut

NGAI JAHTAU MAYU AI

2008-03-12T07:07:00.001-07:00

Dinghku a matu ngu sawn na galaw dat yang,
grup yin gaw ndai wa lawhpa ai da..

Myu a matu ngu galaw yu yang,
nge manang wa tsun ai,
nang mana bu wa sai kun? bai nga......

Sumnung ai hku she nga mat na sai ngu,
daw dan dat yang....
jinghku jingyu ni yawng
Ndai wa grai ahkyak ai nga...

tsun ai ni e......
nanhte ntsun lu mu ga,
ngai ya shingjut kaw makoi nga mat sai.

nge bawnu ni ngai hpe dinglun ai gaw
nang masha hpawng n gwi shang ai,
myit kaji ja nna marai nrawng ai wa
da lwi........
NAWDUT

2008-03-12T07:07:00.000-07:00

# LABAU GAW MAHKRUM MADUP HPE JAW YA AI...

# MUNG MASA GAW GALAI SHAI AI LAM HPE SHABYIN AI.

# MAKAM MASHAM GAW NINGHTOI HPE JAHTOI AI

JAW SHUT & SHUT JAW

2008-02-17T21:07:00.001-08:00

Masha gaw grau grau nna sawn hpan ai lam kung kyang wa yang shut ai lam, jaw ai lam ni mung grau grau law wa, mu wa ai.

Dai zawn re ten ni hta shut ai jaw ai ngu lata la na matu grau yak wa nga ai. Nkau mi shut ai hpe jaw ai shadu, nkau mi jaw ai hpe shut ai shadu rai byin chye nga ai.

Lak lai ai myit masa langai mi gaw jaw ai magam hpe galaw nga nna tinang hkrai nau jaw dum ai lam rai nga ai.

Gashadawn...........

Makam masham lam hpe hkan ai wa gaw tinang she kam sham dik ai zawn chye byin ai.
Shagrit shanem chye ai wa gaw tinang she shagrit shanem dik shadu nna jaw nga ning len chye shut wa ai rai...
Myit su myit gawp re wa, myit su dik dum nna chye gumrawng (jaw shut) wa chye ai....
Masha man hta tinang hkum tinang nbyin, nhkaw, ntai, nkaja ai nga nna shagrit shanem ai hku tsun let, chye shagrit shanem ai ngai nga nna tinggyeng myit makoi rawng taw chye nga ai...

Nkau mi gaw tinang nan myit nkaja dik ai hku mu ai majaw chye sharai la wa ai. Tinang nbyin, nshakut, ntai, nkaja ai lam hkrai rai yang myit hpe sanseng ai hku lu tawn chye ma ai...

Na la ai hpe shalai dat ai sha rai nngai....

GA KUMHPA NI

2008-01-24T00:16:00.001-08:00

Hkau ni e hkri ni e ngu nna mayu da ma lam makyin jing hku lam ni naw jahta chyai mayu nngai oi.....

MR. MG DUT

Tinang a matu sha myit mang let galaw ai wa gaw, si mat ai wa hta grau manu nnga ai.....

NAW NAW

Myu sha ni a matu shakut shaja ai ngu re wa, ya ngai kan tit mat sai......

hkri chyang

Ngai ramma ten salang ni hpe ding lun nngai.... ngai salang rai mat yang ramma ni hpe n gun nlu dum nngai, ngai dingla kaba rai mat sai shaloi masha ni galaw ai hpe chyu yu mada mat ni nngai......

HKAHKU

Tsan tsan de mada lu ai daram mada yu u.. raitim tinang hkum hpe gaw galang wa hkra hkum di re lu....

SHAWNG HKAWN

Blogger: dumdum htehte - Manage Posts

2008-01-24T00:13:00.000-08:00

Blogger: dumdum htehte - Manage Posts

2008-01-12T01:08:00.000-08:00

Mungkan ga gaw lani hte lani grau grau gyip wa nga ai majaw, anhte a matu tsap na shara grai taw wa nga ai.dai zawn re ten hta anhte gara hku sak hkrung ra na.......
Kalang lang myit ra ai hku tatut nbyin wa yang, loi ai lam kaw hkan mat na zawn nga.....myitdik ai lam ni hpe hkan tam nna myit dik ai lam nmu yang lam kaba she hkawm mat na zawn nga nga ai.
Numhtet ga ni hpe hkan tam nga na mung, mayak kaba ni hte hkrum sha chye nga ai. Jaw ai shut ai hpe lata na matu , ndai prat gaw jaw ai mung nau law nga ai le.......
Shada garum hkat ga nga nna jahtau nga ma ai, raitim mai byin na matu gaw nloi nga ai. Shada garum hkat na hta myit hkrum na pi naw shakut ra nga ai. Tinang a matu tinang shakut lu na pi nloi nga ai le.........
ANHTE KANING DI NA HPE ATEN SHAGU SAWN YU DINGLIK YU RA NGA GA AI

2007-12-31T07:03:00.000-08:00

TSAWRA AI MYIT HTE TENG MAN AI GA HPE TSUN NGA YANG, HKRITSTU NGU AI BAW HTA LAM SHAGU KABA RAWT WA NA GA AI.............(Ehpesu 4:15)

HPARENG WA

2007-12-31T05:56:00.000-08:00

Htaw ra de lama mi,ndai de lama mi,
le de ding hkrang , wo de ding hkrang...
na matu mu kyin la ai
nang hpe yu na ngai pi nang zawn grai pu ba ai.

Myit ai lama mi, bungli gaw lama mi
myiman hkrum ten mani sum sai,
shingdu yin yang ningmuk mat ai.
na a matu aloi sha raitim, na nsam hpe
ngai yu yak la ai.

Na nten ni lep lep lap lap,
na shinglet gaw tep tep tap tap
nang hpa tsun nga nta?
Hkum hkrang ting hta rau ai nnga,
mung kan ting hta mu law htum wa,
nang kadai rai ta?

Hpareng hparan ai wa,
hparan hpareng ai wa
hpareng la, hparan sha
Hparang wa..............

HKRI HKA

2007-12-29T23:51:00.000-08:00

WAN JANG GRUP GRUP KAMUNG(2)

NDAI DE MUNG NAW MADA YU MARIT
NANHTE HPE TUT DUM AI WUNPAWNG BUGA DE
MARAWN AI NSEN NI MUNG I NA MA NI?
HTAW RA WA MUNG NGAI HPE TSUN AI
NDAI WA MUNG NGAI HPE TSUN AI
NA LAM CHYU CHYU LE
NANG GARA KAW HPA WA GALAW NGA NTA
NANG HPE LA NGA AI NI , NA MATU MYIT TSANG NGA
HKASHI NSEN NI HPE NMARIT NNI?
NGA REM DABANG NI HPE NDUM NNI?
U GOI NSEN NI HPE NAW NA MAYU AI I?
LA NGA GA AI LE
LAU BAI WA RIT YAW
GARA KAW DU TIM LAU BAI WA RIT
NANG HPE LA AI NI ATEN SHAGU